БИШКЕК, 1-авг. — Sputnik. Билдирбей акырындан акылды алган деменциянын алгачкы белгилери тууралуу психиатр Евгений Кульгавчук Sputnik радиосуна курган маегинде айтып берди.
Адис деменция же болбосо акылдын азышы адамдын жашоо сапатын төмөндөтөрүн белгилеп, бул абал өтө жай жүргөндүктөн деменцияга кабылган адамдын жакындары анын баштапкы белгилерин байкабай калышы мүмкүн.
"Деменция – узак убакытта келе турган абал. Ошондуктан улгайган адамдын жакындары ал башкалардын аттарын унутуп, алмаштырып, ою бир жерде болбой, койгон буюмун таппай, кайсы бир нерселерди ага эстетип коюуну улам суранып баштаганда байкай алышат. Андан кийинки этапта мындай бейтапты үйгө жалгыз калтырууга болбойт. Себеби алар көчөгө чыкса кайра үйдү таап келе албай калышы мүмкүн", – деп эскерткен Кульгавчук.
Ал когнитивдик акылдын азаюусун өз учурунда адиске, психиатрга кайрылуу менен алдын алууга болорун айтат.
"Мен адам унутчаак болуп баратканын айтып баштаган алгачкы күндөрдө эле психиатрга кайрылуу керек деген кеңеш берет элем. Бул менталдык гимнастикага, акылды машыктырууга эле окшош. Мындайда психотерапевт бейтаптын мээсин, анын когнитивдик жөндөмүн жакшыртуу үчүн иш алып барат", – деген адис.
Ал белгилегендей, деменцияны болтурбоо үчүн бардык тармакта активдүү жашоо образын түзүү зарыл экенине токтолгон.
"Деменцияны көп учурда уйкунун бузулушу, ашыкча салмак, кыймылдын аздыгы сыяктуу зыяндуу адаттар шарттайт. Пенсияга чыккандан кийин дагы коомго аралашып, достор менен мамиле түзүп, конокко барып, конок чакырып, жаңы нерселерди үйрөнүп жашоо абдан маанилүү. Адам үмүт менен жашаганда мээ активдүү иштейт. Анан албетте, мээ дагы орган болгондуктан текшерүүдөн өтүп туруу керек", – деп сөзүн жыйынтыктаган Евгений Кульгавчук.