БИШКЕК, 30-июл. — Sputnik. Бажы кызматы санариптештирүү иштеринин аркасында көп көйгөйлөрдү чечип, жакшы натыйжаларга жетип жатат. Бул тууралуу Алмаз Салиев Sputnik Кыргызстан радиосунун эфиринде маек куруп жатып билдирди.
Анын айтымында, Кыргызстан менен Өзбекстандын Бажы кызматтары маалымат алмашкан портал ишке киргенде ыңгайлуулук менен кошо мыйзамдуулук дагы күчөгөн.
"Ишке ашкан чоң долбоордун бирин атасам, бул Кыргызстан менен Өзбекстандын Бажы кызматтары маалымат алмашкан атайын портал болду. Мурда эки өлкөнүн статистикасы дал келбегени айтылып келген. Буга баалардын кымбат көрсөтүлүүсү, документ алмашуудагы айрым иштер себеп болуп келген. Бул маселени чечүү үчүн аталган портал ишке кирди. Эки өлкөнүн Бажы кызматтарынын маалымат алмашуусу натыйжалуу болуп, экспорттук декларация чыгары менен эки тарап тең ал жүк тууралуу тиешелү маалыматты көрө алат. Бул система алгач 2022-жылы иштеп, жарым жылда эле 600 миллион сомдой кошумча төлөмдөрдү алып келди. Былтыр 2023-жылы 1 миллиард 300 миллион сомдой кошумча төлөм болуп, көмүскө аракеттерге толук бөгөт койду. 2023-жылдын жыйынтыгы менен эки өлкөнүн статистикалык көрсөткүчтөрү бири-бирине толук дал келтирилди", — деди Салиев.
Ошондой эле ал учурда дагы бир нече ири санариптик долбоор ишке ашып жатканын кошумчалады.