Кыргызстанда гепатит ооруларына каршы күрөшүү боюнча 10 күндүк жүрүүдө. Саламаттык сактоо министринин орун басары Бүбүжан Арыкбаеванын айтымында, иш-чара 28-июль — Бүткүл дүйнөлүк гепатитке каршы күрөшүү күнүнө карата уюштурулууда жана анын алкагында өлкөнүн бардык аймагында элдин аталган оору тууралуу маалымдуулугун жогорулатуу жана алдын алуу иштери жүргүзүлөт. «Учурда Кыргызстанда гепаттиттин калк арасында таралуу масштабына баа берүүгө жана жуктуруунун негизги тобокелдиктерин аныктоо максатында серологиялык изилдөө жүргүзүлүүдө. Ал үчүн 6 миңден ашык үй-чарбасы тандалып алынган, ошондой эле изилдөөгө 5 жаштан 17 жашка чейинки балдар жана 18 жаштан жогорку курактагы чоңдор катышып жатат». Ошондой эле ал 2024-жылга өлкөдө оорунун алдын алуунун алкагында 100 млн сомго экспресс-тесттер, вакцина, тест-системалар жана дары-дармектер сатып алынганын кошумчалады.
Париждеги Олимпиадада суучул Денис Петрашов жарым финалга өтө албай калды.Ал сууда сүзүү боюнча 100 метрлик аралыкка брасс стилинде жарышка түшкөн. Натыйжада Петрашов биринчи чабак урууда 1 мүнөт 42 милисекундада марага келип, 23-орунду ээледи. Ал жарым финалга чыккан 16 спортчунун катарына кошулган жок. Ошентсе да 30-июлда 200 метрлик аралыкка сүзүү боюнча жарышка катышуу мүмкүнчүлүгү бар.Эске салсак, Парижде өтүп жаткан жайкы Олимпиада оюндары 11-августка чейин өтөт. Анда 329 комплект медаль ойнотулмакчы. Кыргызстандын намысын бул оюндарда 16 спортчу коргомокчу.
ЕАЭБдин пенсиялык камсыздоо боюнча келишимине ылайык, уюмга мүчө өлкөлөрдүн 30 миңден ашык жаранына пенсия дайындалды. Бул тууралуу ЕЭКтин экономика жана каржы саясаты министри Бахыт Султанов билдиргенин "Российская газета" жазды. Келишимде ЕАЭБ мамлекеттеринин биринде иштегендер ошол жактан пенсия алары, башкача айтканда, мигранттардын башка өлкөдө иштегени пенсияга чыкканда эсепке алынары көрсөтүлгөн. Султановдун айтымында, ЕАЭБде аталган тармакты санариптештирүү уюмдун бир өлкөсүнөн экинчисине көчкөндөргө пенсия дайындоо убактысы кыскарат. Былтыр 9 миңден ашык адамга пенсия дайындалса, жалпы 30 миңден ашуун адам пенсия алган. Министр ошондой эле бирдиктүү эмгек рыногунда иш алып барган ЕАЭБ жарандары үчүн артыкчылыктарга токтолду.
АКШнын мурдагы президенти Дональд Трамп Израилдин премьер-министри Биньямин Нетаньяху менен жолугушууда ноябрда кайрадан президенттик кызматка шайланып калса Жакынкы Чыгышта тынчтыкты калыбына келтирүү үчүн болгон аракетин жумшай турганын айтты. Бул тууралуу республикачыл саясатчы шайлоо алдындагы билдирүүлөрүндө айтканын РИА Новости агенттиги жазды. "2023-жылдын 7-октябрында Израилге жасалган каардуу кол салуудан улам Трамп Израиль менен тилектештигин билдирген. Ошондой эле Ак үйгө кайтып келери менен Жакынкы Чыгыш өлкөлөрүндө тынчтыкты орнотуу үчүн болгон күчүн жумшай турганын, АКШнын бардык аймактарындагы жогорку окуу жайларында антисемитизмдин жайылышына каршы күрөшөрүн убадалаган", – деп айтылат маалыматта.