Кыргыздын туусун бийик желбиреткен спортчуларыбыздын саны барган сайын арбып барат. Бул тууралуу Садыр Жапаровдун кайрылуусунда айтылат. Өлкө башчы тарыхыбызда спортчулар: Каныбек Осмоналиев, Сатымкул Жуманазаров, Мария Кулчунова, андан берки тарыхыбызда Талант Дүйшөбаев, Канат Бегалиев, Руслан Түмөнбаев өлкөгө Олимпиададан жеңиш менен келгенин эске салган. "Ошентсе да, Кудайга миң мертебе шүгүрчүлүк, ата-бабаларыбыздын, Айкөл Манас баатырдын беттегенин бербеген көктүгү урпактарга кан менен өтөт көрүнөт, намыска жарап, кыргыздын туусун бийик желбиреткен спортчуларыбыздын саны барган сайын арбып барат. Кыргыз спортуна оомат эми келди. Ушул келген бактыбызды бапестеп багып алышыбыз керек", — деген президент өз кайрылуусунда. Мамлекет башчы XXXIII жайкы Олимпиадада кыргыз спортчуларын ийгилик жылоолоп, Ата Мекенине албан жеңиштер менен кайтышын тилеген.
КМШ өлкөлөрүнүн биринде теракт уюштурууга даярданып жүргөн деп Кыргызстандын Н.Р. аттуу жараны кармалды. Бул тууралуу УКМК маалымдады.Атайын кызматтын билдирүүсүнө ылайык, кармалган адам эл аралык террордук уюмдун мүчөсү. "Анын Telegram мессенжеринде жашыруун аккаунттары бар. Алар аркылуу жасаган бардык аракеттери террордук уюмдардын биринин эмиссарлары тарабынан координацияланганы аныкталды. Н.Р. эл аралык террордук уюмдун жетекчисине ант берген. Аталган факт боюнча козголгон кылмыш иштин алкагында УКМК өнөктөш кызматтар менен террористтик топтун башка катышуучуларына карата тергөө амалдарын жүргүзүүдө", – деп айтылат маалыматта. Шектүү тергөө абагына киргизилген.
Чүй облусунун ички иштер башкы башкармалыгы кенже жетектөөчү курамдагы кызмат орундарына сынак жарыялады.Талапкерлердин документтери 15-августка чейин кабыл алынат. Конкурс үч этапта өткөрүлөт: биринчи этап — укук коргоо органдары үчүн бекитилген күч ченемдерин тапшыруу; экинчи этап — тесттен өтүу; үчүнчү этапта — аңгемелешүү болот.Ошондой эле укук коргоо органдарынын кошумча талаптарына туура келиши шарт.
Демократтар ноябрдагы президенттик шайлоого вице-президент Камала Харристи талапкер катары тандап, ката кетиришти. Бул тууралуу Мамдепартаменттин эки тараптуу орус-америкалык президенттик комиссиянын мурдагы кеңешчиси Жеймс Карден билдиргенин РИА Новости жазды. Анын айтымында, Камала Харрис дебатта жалындуу сүйлөп, добуш берүүчүлөрдү ынандыра албайт. "Менимче, демократтар ката кетиришти. Алар Байденди сактап калышса жакшы болмок", — деди ал. Карден алдыдагы шайлоодо Дональд Трампка Харристи жеңүү кыйынчылык туудурбай турганын белгиледи. "Харристин коомчулук менен болгон "бал айы" көпкө созулбайт. Сентябрь, октябрдагы шайлоо өнөктүгүнө эл ынтызарлык менен көңүл бура баштаганда анын чыныгы жүзүн көрүүгө болот", — дейт отставкадагы америкалык дипломат. АКШда президенттик шайлоо 5-ноябрда өтөт. Ага Демократиялык партияны учурдагы президент Жо Байден баштап барары болжолдонгон. Бирок Дональд Трамп менен июндагы дебаттагы начар көрсөткүчтөрдөн кийин демократтардын арасында Байденди күрөштөн баш тартууга чакырыктар күчөй баштады. 21-июлда Байден жарыштан баш тартып, вице-президент Камала Харристин талапкерлигин колдоду.