Биз эмгек мыйзамдары сакталбай укугу бузулган бардык тараптар менен иштешебиз. Иш берүүчүнүн укугу бузулса аны коргойбуз. Кызматкердин укугу тебеленсе анын тарабында болобуз. Биздин милдет эмгек мыйзамдарынын так аткарылышын көзөмөлдөө. Бул тууралуу Кубанычбек Сыргабаев Sputnik Кыргызстан радиосуна маек куруп жатып билдирди.
Анын айтымында, аталган мекеме тараптарга кеңеш дагы берет.
"Биздин мекеме Эмгек, социалдык камсыздандыруу жана миграция министрлигине карайт. Алгач Эмгек инспекциясы болуп 1999-жылы түзүлгөн. Андан соң Экология жана техникалык көзөмөл инспекциясынын курамында тогуз жыл иштедик. 2021-жылкы реформанын алкагында Эмгек министрлигине кошулдук. Бизге эмгек укугу бузулган бардык жарандар кайрыла алат", — деди Сыргабаев.
Ал инспекторлор тараптарга алгач консультация берип абалды оңдоого аракет кыларын белгиледи.
"Иш берүүчү деле өзүнө тиешелүү бардык милдеттерин так билбей калышы ыктымал. Бирок түшүндүрүү иштеринен натыйжа чыкпаса мыйзам бузууга жараша 13 миң сомдон 60 миң сомго чейинки айып салынат. Ал дагы аткарылбаса иш сотко өтөт. Биздин эмгек кошуундарынан айырмабыз ушул. Бүтүмдөрүбүз кынтыксыз аткарылууга тийиш. Эмгек кошуундары болсо бүтүм чыгарып бере албайт, алар сунуш гана киргизишет. Биз телефон аркылуу кайрылгандарга консультация дагы беребиз. Көп учурда арыз жазууга жеткирбей эле маселе оң жагына чечилип калат" — деди Сыргабаев.
Ал Социалдык фонд менен биргеликте жумушчуларды расмий ишке орношууга үндөп, түшүндүрүү иштерин жүргүзүп келишерин кошумчалады.