Кечки жанылыктар менен тааныштырып студияда Арууке Амирдинова. Саламатсыздарбы. Бул чыгарылышта:Ош шаарында жаңы базардын курулушу башталдыЕАЭБ өлкөлөрү Индия менен соода келишимин иштеп чыгууга даярСадыр Жапаров Кыргызстандын Франциядагы элчилигинин жаңы имаратына барды. Алдыда кененирээкКыргызстан дипломатиялык кызматкерлер үчүн чет өлкөлөрдөн имарат сатып алат. Бул тууралуу Садыр Жапаров Франциядагы элчиликтин имаратына барганда билдирди. Буга чейин элчиликтегилер 53 чарчы метр аянттагы кеңседе отурушса, эми алар жаңы сатып алынган жерге көчүшкөн. Президент “өлкөнүн эгемендик жылдарында чет өлкөдөгү мүлктү ижарага алууга кеткен суммага өз имараттарын сатып алса болмок” деп белгиледи. Өлкө башчы Тышкы иштер министрлиги Венгриядан имарат алганын, Швейцария, Австриядан жана Новосибирск шаарынан кыймылсыз мүлк сатып алуу иштери жүрүп жатканын билдирди. Ал эми Нью-Йорк менен Берлинде дипломатиялык миссиялардын кызматкерлери үчүн кызматтык батирлерди алуу пландалууда.
Министрлер кабинетинин төрагасынын орун басары Эдил Байсалов америкалык конгрессмендердин Израилдин премьер-министрине шатырата кол чабуусун сындады. Буга чейин Беньямин Нетаньяху АКШ Конгрессинде сөз сүйлөгөн. Бул дүйнөдө ар кандай кабыл алынды. "Кечээ кечинде Нетаньяхунун сүйлөгөнүн көрдүм. Анын кебинин мазмуну эмес, ар бир сөзү АКШ Конгрессинде дүркүрөгөн кол чабуулар менен коштолгону кыжырды келтирди. Мунун артында кандай саясат турганы коркунучтуу көрүнүш. Бул АКШ саясатына болгон дүйнөдөгү көз карашты кантип өзгөртө алат?" — деп жазган ал өзүнүн баракчасына. Израилдин премьер-министринин Конгрессте сүйлөгөнү Капитолийдин алдында согушка каршы активисттердин нааразылык акциялары менен коштолду. Полиция айрым катышуучуларды камакка алды.
ЕАЭБ өлкөлөрү Индия менен кызматташуунун жаңы формаларын, анын ичинде преференциялык соода келишимин иштеп чыгууну кароого даяр. Бул тууралуу Евразия экономикалык комиссиясынын соода министри Андрей Слепнев Индиянын соода жана өнөр жай министринин орун басары Сунил Бартвал менен жолугушууда билдирди. Алар ЕЭК менен Индиянын соода кызматташтыгы жогорку потенциалга ээ экенин белгилешкен. Муну жүзөгө ашыруу үчүн соода жүгүртүүнүн түзүмүн диверсификациялоо жана экономиканын түрдүү тармактарында кызматташууну кеңейтүү зарыл. Слепневдин айтымында, ЕАЭБ мамлекеттери өз ара соода жүгүртүүнүн көлөмүн көбөйтүүгө жана товарлардын ассортиментин кеңейтүүгө мүмкүнчлүк берүүчү преференциялык соода келишимин иштеп чыгууга даяр
Ош шаарында жаңы муниципалдык базардын курулушу башталды. Бул тууралуу мэриядан билдиришти.Маалыматка ылайык, Осмонов көчөсүндөгү иштин жүрүшүн мэр Бакытбек Жетигенов көрүп чыккан. "Учурда курулушту эки нөөмөттө жүргүзүү үчүн электр мамычалары орнотулуп, чубалгылар тартылууда. Курулуш иштерине 15тен ашык атайын техника тартылды. Базарга төрт тараптан жол салынат", — деп айтылат маалыматта. Ошондой эле бул жерде соодагерлер үчүн бардык шарттар түзүлөрү кошумчаланды. ЭМИ ВАЛЮТА КУРСУ МЕНЕН ТААНЫШЫП АЛЫҢЫЗДАР Улуттук банктын билдирүүсү боюнча ушул тапта: 1 АКШ доллары 84 сом 20 тыйынга 1 евро 91 сом 32 тыйынга 1 рубль 97 тыйынга Казак тенгеси 17 тыйынга барабар МУНАЙ БААСЫ Бишкекте орточо эсеп менен алганда Аи 92 үлгүсүндөгү бензин 65 сом 40 тыйындан баштап, 67 сом 40 тыйынга чейин, Аи 95 үлгүсүндөгү күйүүчү май 72 сом 90 тыйындан тарта, 74 сом 40 тыйынга чейин, дизель майы 73 сом 80 тыйындан, 74 сом 30 тыйынга дейре, ал эми унаа газынын литри 33 сом 70 тыйындан сатылууда. АБА ЫРАЙЫ 27-июлга караган түнү жаан-чачын күтүлбөйт. Түштүк-батыштан соккон шамалдын ылдамдыгы секундасына 3-8 метрге жетет. Ишембиде кундуз тоолуу жерлерде өткүн өтүп, күн күркүрөсө, дыйканчылык аймактарда күн ачык болот. Бул тууралуу Кыргызгидромет билдирди. Абанын температурасы Чүйдө +35…+40, Талас аймагында +33...+38, Ош, Жалал-Абад жана Баткен облустарында +35...+40, Ысык-Көл, Нарын өрөөнүндөрүндө +28…+33 градус жылуу болот. Күндүн табы Бишкекте +37...+39, Ош шаарында +38…+40, Чолпон-Атада +29...+31 градуска чейин көтөрүлөт.