БИШКЕК, 23-июл. — Sputnik. Кыргызстанда айрым дисциплиналарды системалуу окутуу пландалууда. Бул тууралуу Кыргыз билим берүү академиясынын президенти Назира Дүйшеева билдирди.
Ал Sputnik агенттигинин маалымат борборунда 12 жылдык окутууга өтүүгө арналган брифингге катышты.
Айтымында, 12 жылдык окутууда "секириктер" болушу ыктымал, мисалы, окуучулар 1-класстан үчүнчүгө атташы мүмкүн.
"Бул "секириктерден" улам балдар жетиштүү билим албай калбайт. Анткени окутуу системалуу болуп, жалпы программаны камтыйт. Балким, кээ бир сабактардын сааты кыскартылып, айрымдары айкалыштырылышы ыктымал", — деди Кыргыз билим берүү академиясынын президенти.
12 жылдык окутуу программасына өтүүдө тилдерди, анын ичинде мамлекеттик жана расмий тилди үйрөтүүдө жаңы ыкмалар колдонулат. Ошондой эле жаңы сабак кошулат. Дүйнөдө ал "science" (илим) делет, Кыргызстанда башкача аталышы ыктымал. Ал сабак физика, химия жана биологияны айкалыштырат. Булар мектепте окутуунун биринчи баскычына өтөт.
Интеграцияны камтыган STEM (science, technology, engineering, mathematics) ыкмасына басым жасалат.
"Жөнөкөй тил менен айтканда, мисалы, суу темасы физикада биринчи чейректе, химияда экинчи жарым жылдыкта, ал эми биология боюнча кийинки класста окутулат. Демек, суу темасы ар кайсы багытта башка-башка убакта окутулуп, окуучулар суунун өзгөчөлүктөрүн, касиеттерин унутуп калат. Ошондуктан химия, биология жана физикадан темаларды бир учурда жана системалуу түрдө окутууну колго алуу зарыл", — деди Дүйшеева.
Ал жаңы сабак айрым класстарга убактылуу киргизилип, кийин дисциплиналарга бөлүнүшү мүмкүн экенин айтты. Мисалы, башталгыч класстарда өтүлүүчү мен жана дүйнө сабагы адеп, мекен таанууну камтыйт. Жогорку класстарда ал адам жана коом болуп өзгөрүүдө.
Эске салсак, Билим берүү жана илим министрлиги мектептерди 12 жылдык окууга өткөрүү боюнча концепцияны жарыялаган. Ал үчүн бюджеттен 26 миллиард сом талап кылынат. Анын бир бөлүгү 168 мектепти курууга керектелет.