БИШКЕК, 22-июл. — Sputnik. Батыштын Россияга салган санкциялары ийгиликсиз болуп калды, эми анын кесепети Европа биримдигине тийиши мүмкүн. Бул туурасында Handelsblatt басылмасы Экономикалык изилдөөлөр боюнча европалык институттарга таянып билдиргенин Известия жазды.
Макалада аскердик өнөр жайдан улам Россиянын экономикалык өнүгүүсү уланып жатканы да белгиленген.
"Эгерде жакшылап көз сала келсек, Батыштын санкция саясатын ордунан чыкпай калды деп айтууга болот. Согушту токтотуу үчүн салынган санкциялар туурасында сөз кылсак, чектөөлөр натыйжасын узак, созулуп кеткен мөөнөттө эмес, тезирээк бериши керек", — деп жазылган макалада.
Handelsblatt "Батыш кааласа, каалабаса да" Россия келечекте дүйнөлүк соодага катышарын жазды. Ошол эле учурда салынган чектөөлөр Европа биримдигине, мисалы, газ менен мунайдын баасын кымбаттатып зыянын тийгизет.
Мурдараак, 19-июлда АКШнын мамлекеттик катчысы Энтони Блинкен россиялык санкциялардын майнабы болбой жаткандыгын мойнуна алган эле. Ал РФ антироссиялык санкцияларга карабай өзүнүн коргонуу-өнөр жай базасына колдоо алган жолду таба алгандыгын айткан болчу.
17-июлда нидерландиялык эркин журналист Соня ван ден Энде Москвадагы дүкөндөрдөн каалаган товарларды табууга болорун, ал эми Европалык чектөөлөр өзүнүн таасирин тийгизе албагандыгын жазган. "Другая Украина" эл аралык коомдук кыймылынын мүчөсү, экономика илимдеринин кандидаты Александр Дудчак Известияга Батыш антироссиялык чектөө киргизгени менен пландаган натйжага жете албагандыгын айтып берген.
5-июнда РФ президенти Владимир Путин Батыштын өлкөлөрү атайын операция башталгандан тарта бир нече ай катары менен Россиянын экономикасын чөгөлөтүүгө камынып, бирок ал нерсе максатына жетпегендигин белгилеген. Ал өлкө сатып алуу боюнча жөндөмдүүлүк паритетинин жана Ички дүң продукциясынын көлөмү боюнча дүйнөлүк рейтингде алдыңкы төрттүккө кире алгандыгын белгилеген.