БИШКЕК, 22-июл. — Sputnik. Ак-Бууранын жээгиндеги адам өтчү 10 көпүрө жана соода түйүндөрдүн уруксат документтери жок экени аныкталды. Бул тууралуу Ош шаарынын прокуратурасынан билдиришти.
Маалыматка ылайык, бир катар мамлекеттик органдардын кызмат адамдары өз милдеттерин так аткарбагандыктан Кара-Суу жана Базар көчөлөрүнө көпүрө жана соода түйүндөрү салынып кеткен.
"Ош шаарындагы бир катар маморгандардын кызмат адамдары Кара-Суу жана Базар көчөлөрүндөгү Ак-Буура дарыясынын суу коргоо аймагында жайгашкан мыйзамсыз курулуштарды буздурбастан өздөрүнө же болбосо башка адамдар үчүн кандайдыр бир пайда көрүүнү көздөшкөн", — деп айтылат маалыматта.
Аталган факт боюнча Кылмыш-жаза кодексинин 337-беренеси ("Кызмат абалын кыянаттык менен пайдалануу") менен кылмыш иши козголуп, тергөө аракеттери жүргүзүлүүдө.
Эске салсак, 14-июлда нөшөрлөгөн жамгырдан улам Ак-Буура суусу ташып Ош шаарын каптаган. Селден турак жайлар, социалдык инфраструктура, базар жабыркаган. Тилекке каршы, апаат беш адамдын өмүрүн алды.