БИШКЕК, 21-июл. — Sputnik. Президент Садыр Жапаров ХХХІІІ жайкы Олимпиада оюндарына лицензия жеңип алган спортчулар менен жолугушуп, Кыргызстандын курама командасынын капитаны Акжол Махмудовго мамлекеттик тууну тапшырганын өлкө башчынын маалымат кызматы билдирди.
Мамлекет жетекчиси Олимпиада дүйнөлүк масштабдагы иш-чара экенин, маанилүү орунду ээлей турганын белгилеген. Президент сөзүндө эгемендик жылдар аралыгында өлкө Олимпиада оюндарынан үч күмүш жана төрт коло жеңип алганын эске салды. Алардын баары жайкы Олимпиадаларда жетишилген ийгиликтер болгон. Сиднейде дзюдочу Айдын Смагулов коло медаль, Пекинде балбандар Канат Бегалиев күмүш, Руслан Түмөнбаев менен Базар Базаргуруев коло медалдарды жеңип алган. Токиодогу Олимпиадада Айсулуу Тыныбекова жана Акжол Махмудов күмүш медалдарды, Мээрим Жуманазарова болсо медаль алганын эске салды.
Президент жакында боло турган жайкы Олимпиадага Кыргызстандын спортчулары күрөш, дзюдо, сууда сүзүү, жеңил атлетика жана бокс боюнча жалпы 16 лицензияга ээ болгонун кошумчалап, алардын басымдуу бөлүгү күрөш боюнча экенине токтолгон.
"Күрөш биздин олимпиадалык спорттун түрлөрүнүн ичинен негизги локомотиви болуп, Кыргызстан бүт дүйнөгө таанылып, даңазаланды. Бүгүн бул жерде үч жылдан бери кайрат-күчүн жыйып, талап кылынган тартипти катуу сактап, өжөрлөнө машыгып, акыры Кыргызстандын намысын коргоо укугуна ээ болгондор чогулуп отурушат. Дегеле соңку жылдары өлкөбүздө спорт жаатында күчтүү жаш муун өсүп келе жатат. Спортчуларыбыздын келечеги али алдыда", – деп белгилеп, жалпы машыктыруучулар жамаатына кесипкөйлүгү менен таланты үчүн ыраазычылык билдирди.
Мамлекет башчысы Токиодо өткөн Олимпиада оюндарында Кыргызстан алтын медалга бир кадам жетпей калганын эске салып, андан бери үч жыл өткөнүн, бул жылдар аралыгында Кыргызстан бардык тармактар боюнча өз мүмкүнчүлүктөрүн кеңейткенин белгилеген.
"2021-жылы сиздер менен жолукканда биздин жалпы максатыбыз — 2024-жылдагы Париж Олимпиадасында биринчи орундарды камсыз кылуу, алтын медаль жеңүү деп айттым эле. Бул менин эле сөзүм эмес, элдин дагы суроо-талабы, үмүт-тилеги болгон. Мына ошол үмүт-тилектерди актоого мезгил келди деп ойлойм. Эгемен Кыргызстандын Олимпиада тарыхындагы биринчи алтын медалын жеңип, көз карандысыз Кыргызстандын 33 жылдыгына, Кара-Кыргыз автономиялуу облусунун түзүлгөндүгүнүн 100 жылдыгына карата белек кыласыңар деп бекем ишенем", — деп белгиледи президент.
Жапаров өз сөзүндө олимпиадалык алтын үчүн күрөш өтө курч болорун, бирок биздин спортчулар кандай гана кыйын таймаштар болбосун тайсалдап калбай турганын белгилеп өттү.
"Тескерисинче, мындай кыл чайнашкан учурлар спортчуларыбызды чыйралтып, ого бетер күчтүү, ого бетер намыстуу, ого бетер ишенимдүү кылып келген. Айкөл Манас баштаган бабаларыбыздын көк жалдыгын, көздөгөнүнө жете билген өжөрлүгүн Париждеги Олимпиада оюндарында көрсөтөсүңөр деп ишенем. Силер 7 миллион кыргызстандыктын ой-санаасында турасыңар, силерди жүз миңдеген мекендештериңер жеңиш менен күтөт", – деген ал.
Иш-чаранын аягында Жапаров улуттук курама команданын капитаны Акжол Махмудовго Кыргызстандын мамлекеттик желегин тапшырды.