Бишкекте саат 13-00! Жаңылыктар менен тааныштырып студияда Кенжебай Сатканалиев. Саламатсыздарбы? Бул чыгарылышта:
Ысык-Көлдө 12 жашар өспүрүм үч аялды куткардыӨлкөдө жол эрежелерин сактоого чакырган электрондук эскертүүлөрү бар LED- экрандар орнотулуудаКыргыз-өзбек заводунан чыккан автоунаалардын баалары жарыяланды алдыда кененирек...
Кыргыз-өзбек автозаводунан темир тулпар алгысы келгендер үчүн "Жеңилдетилген автокредит" долбоору башталды. Бул тууралуу Экономика жана коммерция министрлигинен кабарлашты. Ага ылайык, насыялар мамлекеттик Элдик Банк жана Айыл Банк тарабынан 8 пайыз жылдык үстөгү, 20 пайыз минималдуу баштапкы төлөмү менен берилет. Заводдон чыгарылган автоунаалардын баасы: Шевроле Кобальт — 1 057 300 сом Шевроле Оникс — 1 З61 200 сом Шевроле Трэкер — от 1 667 800 сом Damas минибусу — от 736 400 сом Labo микровэни — 740 400 сом. Экономика министрлиги "Тулпар Моторс" заводунун ишке кириши Кыргызстандын автомобиль өнөр жайын өнүктүрүүнүн жаңы этабы болгонун белгиледи. Долбоордун алкагында 1000 жумушчу орду түзүлүп, жалпы инвестициянын көлөмү 50 миллион долларга жакын болот. Долбоор үч этап менен ишке ашат. Эске салсак, Чүй облусунун Москва районунда жайгашкан кыргыз-өзбек заводунун расмий ачылышы 18-июлда болуп, ага президент Садыр Жапаров менен Өзбекстан башчысы Шавкат Мирзиеев онлайн катышкан.
Ысык-Көл облусунун 12 жаштагы тургуну Алинур Каракол шаарынын жанында көлгө чөгүп бараткан үч аялдын өмүрүн сактап калды. Ички иштер министрдигинен билдиришкендей, анын тез кабыл алган чечими жана кайраттуулугу кырсыкты алдын алууга шарт түзгөн. Окуя , 20-июль күнү кечинде болгон. Анда Алинур апасы жана карындаштары менен көл жээкте эс алып жүргөн. Жардам сураган үндөрдү уккан бала, толкунга туруштук бере албай, чөгүп баштаган аялга жардам берүү үчүн сууга кирген. Ошол маалда эки аял чөгүп жаткан аялга жардам берүүгө аракет кылышып, бирок, алар дагы чөгө башташкан. Алинур сууда сүзүү чеберчилигин көрсөтүп, сууга чөгүп бараткан аялдарга катары менен жардам көрсөтүп, жээкке жеткирген. Анын эрдиги кырсыкты алдын алып, адамдардын өмүрүн сактап калган.
Өлкөдө айдоочуларды ылдамдыкты ашырбоого, коопсуздук курун тагынууга жана жалпы жол эрежелерин сактоого чакырган электрондук эскертүүлөрү бар LED- экрандар орнотулууда. Бул тууралуу Жол кыймылынын коопсуздугун камсыздоо башкы башкармалыгынын басма сөз кызматы кабарлады. Маалыматка ылайык, туристтик мезгил учурунда өлкө аймагында айдоочуларга эскертүүлөр жазылган 115 баннер илинип, жана 66 LED-экран орнотулган.
Владимир Зеленский ички да, тышкы да саясаттагы чоң көйгөйлөрдөн улам Россия менен сүйлөшүүлөргө даярдыгын көрсөтүүдө. Бул тууралуу РИА Новости жазды. "Ушул тапта Киев кош соккуга туш болууда, биринчиден, фронтто кырдаал оор, экинчиден, Украинанын жакын союздаштары тарабынан келечекте колдоо болор-болбосунун белгисиздиги", — деп жазылат маалыматта. Аналитик Орыся Луцевич белгилегендей, абалдын оордугу Владимир Зеленскийди Москва менен сүйлөшүүлөрдү жүргүзүү боюнча кептин четин чыгарууга мажбур кылууда. "Бул көрүнүш бир эле учурда Россияга дагы, глобалдык Түштүккө дагы Украина кандайдыр бир каршылаш күч эмес экендигинин белгиси. Ал сүйлөшүү жолуна өтүүгө даяр", — деп жазылган маалыматта. Буга чейин Зеленский Украинада өтө турган экинчи тынчтык саммитине Россиянын өкүлдөрү дагы катышышы керектигин билдирген.