Ош шаарындагы борбордук базар Жапалак айылына көчүрүлмөкчүАКШ Киевге Россия аймагына сокку урууга уруксат берген позициясын өзгөртүшү мүмкүнМандатын тапшырган Тазабек Икрамов элге кайрылып, принциби тууралуу айттыТазабек Икрамов Жогорку Кеңештин депутаттыгынан баш тартып, өз ыктыяры менен мандатын тапшыргандан кийин биринчи жолу элге кайрылуу жасады. Мурдагы эл өкүлү шайлоочуларына ыраазычылык билдирип, дайыма эл тарапта болгонун социалдык баракчасына жазды. "Жеке чечимим, өз каалоом менен депутаттык ишмердүүлүгүмдү токтотуп, мандатымды тапшырдым. Буюрса, эл үчүн кыла турган кызматым али алдыда. Буга чейин эл үчүн кандай күйсөм, ошол принцибим күчөйт, азайбайт!" — деди Икрамов. Эске салсак, Жогорку Кеңештин депутаты Икрамов кечээ, 19-июлда, өз ыктыяры менен депутаттык мандатын тапшырган.
19-июлда Сириянын түндүк-чыгышындагы качкындар лагерлеринде жүргөн 22 кыргызстандык жаран Кыргызстанга алып келинди. Бул тууралуу Тышкы иштер министрлигинин басма сөз кызматы билдирди. Маалыматка караганда, алардын сегизи аял киши, 14ү балдар. Аларды мекенине кайтаруу АКШ өкмөтүнүн колдоосу менен “Айкөл-6” гуманитардык миссиясынын алкагында ишке ашты. Быйыл февралда «Айкөл» гуманитардык миссиясынын алкагында Сириядагы 99 адам Кыргызстанга алып келинген. 2021-жылдан бери Сирия жана Ирактан Кыргызстандын 517 жашы жете элек жараны жана балдар мекенине кайтарылганын Эмгек, социалдык камсыздоо жана миграция министрлиги маалымдады.
Ош шаарындагы борбордук базар Жапалак айылына көчүрүлөрүн калаа мэриясынан билдиришти. Маалыматка ылайык, жаңы базар Көкүмбий көчөсүнө, Ош автоунаа базарынын жанындагы 16,7 гектар жерге курулат.Ош шаарынын башчысы Бакытбек Жетигенов кечээ борбордук базар көчүрүлө турган жер тилкесин көрүп чыгып, тиешелүү кызматтарга көчүрүү боюнча даярдык иштерин баштоону тапшырган. Эске салсак, УКМК төрагасы Камчыбек Ташиев кечээ, 19-июлда, Оштогу селден жабыркаган базар башка коопсуз жайга көчүрүлөрүн билдирген. Ал ошондой эле Ак-Бууранын жээгиндеги мыйзамсыз курулуштар, көпүрөлөр, эс алуучу жайлар алынарын кошумчалаган.
АКШ Украинага америка куралы менен Россиянын аймагына сокку урууга уруксат берүү боюнча позициясын өзгөртүшү мүмкүн. Бул тууралуу Ак үйдүн улуттук коопсуздук боюнча кеңешчиси Жейк Салливан билдиргенин РИА Новости жазды. Аткаминердин айтымында, Вашингтон бул маселе боюнча так чечим кабыл ала элек. "Бул суроого так жооп бере албайм. Россия Харьковго чабуул баштаганда логика боюнча, Украинага сокку урууга мүмкүнчүлүк берүү талап кылынды", — деди ал. Июнда Салливан Россияга чабуул жасоодо америкалык куралды колдонууга берилген уруксат каршылаштары Украинанын чек арасын кесип өткөн аймактарга гана тиешелүү экенин билдирген. Бирок, башталышында бул Харьков облусуна чектеш аймактарга гана карата болору айтылган эле.
ЭМИ ВАЛЮТА КУРСУ МЕНЕН ТААНЫШЫП АЛЫҢЫЗДАР Улуттук банктын билдирүүсү боюнча ушул тапта: 1 АКШ доллары 84 сом 64 тыйынга 1 евро 92 сом 07 тыйынга 1 рубль 96 тыйынга Казак тенгеси 17 тыйынга барабар МУНАЙ БААСЫ Бишкекте орточо эсеп менен алганда Аи 92 үлгүсүндөгү бензин 65 сом 40 тыйындан баштап, 67 сом 40 тыйынга чейин, Аи 95 үлгүсүндөгү күйүүчү май 72 сом 90 тыйындан тарта, 74 сом 40 тыйынга чейин, дизель майы 73 сом 80 тыйындан, 74 сом 30 тыйынга дейре, ал эми унаа газынын литри 33 сом 70 тыйындан сатылууда. АБА ЫРАЙЫ 21-июлга караган түнү жаан-чачын күтүлбөйт. Батыштан соккон шамалдын ылдамдыгы секундасына 4-9 метрден, күндүз айрым жерлерде 15-20 метрге жетет. 21-июлда тоолуу жерлерде өткүн өтүп, күн күркүрөсө, дыйканчылык аймактарда күн ачык болот. Мындай маалыматты Кыргызгидромет таратты. Абанын температурасы Чүйдө +31...+36, Талас аймагында +29...+34, Ош, Жалал-Абад жана Баткен облустарында +32...+37, Ысык-Көл жергесинде +23...+28, Нарын өрөөнүндө +24...+29 градус жылуу болот. Күндүн табы борбор калаада +33...+35, Ош шаарында +35...+37, Чолпон-Атада +23...+25 градуска чейин көтөрүлөт.