БИШКЕК, 19-июл. — Sputnik. Демократтардан шайланган Кошмо Штаттардын мурдагы президенти Барак Обама өлкөнүн азыркы лидери Жозеф Байден талапкерлиги алдыдагы шайлоодо канчалык "туруктуу" болорун ойлонушу керек деп эсептейт. Бул туурасында Washington Post жазды.
"Обама акыркы күндөрү өзүнүн айланасындагыларга Байден жеңишке караандабастыгын, азыркы президент өзүнүн талапкерлиги сыноолорго туруштук бере алабы деген нерсени ойлонушу зарылдыгын айткан. Муну мурдагы лидердин пикиринен маалымдар болгон кишилер билдирген", — деп айтылат макалада.
Басылма Байдендин атаандашы Дональд Трамп менен соңку дебаты ийгиликсиз болуп калганына карабай колдоп чыккан Обама анын түшүп бара жаткан рейтингине түйшөлүп жатканын жазган. Ал мурда Обаманын администрациясында вице-президент болгондуктан, экөөнү достук мамилелер да байланыштырып турат. Көрүнүктүү бир топ демократтар экс-президентке бул маселени талкуулоону сунушташкан.
Мындан сырткары New York Times Байденге жакындар адамдар президент күздөгү ат салышта жеңе албайт, андан улам шайлоого катышуудан баш тартышы керектир деген ойго жетелене баштагандыгын жазган.
Муну менен катар эле басылманын маалымат булактарынын бири азырынча президент саясий өнөктүктөн чыгып кетүү боюнча акыркы чечимин кабыл ала электигин билдирген. Дагы бири аталган лидер тиешелүү билдирүүсүн жасап, АКШнын вице-президенти Камала Харристи өзүнүн ордуна келчү талапкер катары колдой турганын жар салса, анысы жаңылык деле болбошун айткан.
Ал эми Ак үй Байден президенттик жарыштан чыгып кетиши мүмкүн деген кеп-сөздөрдү танууда. Басылма бул мамлекет башчыга басым кылыш үчүн Демократтар партиясынын таасирдүү мүчөлөрүнүн "биргелешкен кампаниясынан чыгып" жаткан нерселер экенин белгилешкенин жазды.
Демократтар арасында Трамп менен болгон дебаттан кийин Байдендин ордуна башка талапкерди көрсөтүү боюнча чакырыктар көп салына баштады. Партиянын августта өтө турчу съездинде теориялык жактан мындай мүмкүнчүлүк бар, бирок иш жүзүндө эгерде өзү эле баш тартпаса, саясий жарыштан аны четтетүү кыйыныраак болуп калат. Ал эми Байдендин өзүнүн бул өнөктүктө аягына чейин ат салышуу ниети бар. Анын Трамп менен экинчи дебаты 10-сентябрга пландалган. АКШнын президентин шайлоо 5-ноябрда өтмөкчү.