БИШКЕК, 18-июл.— Sputnik. Мамлекет башчы Садыр Жапаров менен Өзбекстан лидери Шавкат Мирзиёев Кыргызстандын Өзбекстандагы маданият күндөрүнүн расмий ачылышына катышты.
Ташкенттеги Форумдар сарайында өткөн аземге эки лидердин жубайлары Айгүл Жапарова, Зироатхон Хошимова да барды.
Программанын алкагында жогорку даражалуу меймандар үчүн гала-концерт уюштурулуп, анда кыргыз жана өзбек драма театрларынын актерлорунун аткаруусундагы “Улут жүзү” театралдык оюну коюлган.
Ошондой эле Нурдин Түгөлов атындагы кыргыз мамлекеттик “Ак марал” бий ансамбли аткарган “Эргиме” хореографиялык композициясы тартууланып, Муса Баетовдун репертуарынан “Камбаркан” фольклордук-этнографиялык ансамблинин аткаруусундагы “Сагынам” чыгармасы жаңырды.
Кыргызстандын Өзбекстандагы маданият күндөрү 22-июлга чейин созулат.