БИШКЕК, 18-июл. — Sputnik. Бишкектеги "Дордой" базарында калкка акысыз медициналык кызмат көрсөткөн эки мобилдик клиника иштеп жатканын Саламаттык сактоо министрлиги билдирди.
© Фото / пресс-служба Минздрава КР
Маалыматка караганда, ал жактан базарга келген адамдар же базарда иштеген адамдар эртеңкиге чейин (19-июлга чейин) гепатит жана башка ооруларга текшерилсе болот.
Мобилдик клиникалар төмөнкү кызматтарды көрсөтөт:
Жалпы практикалык дарыгердин жана акушер-гинекологдун консультациясы;
АИВ, В жана С вирустук гепатиттерине, сифилиске тестирлөө;
Ички органдардын УЗИси;
АИВ жана сифилис инфекциясын алдын алуу боюнча санитардык-агартуу иштери;
Вирустук гепатиттин В түрүнө каршы эмдөө жүрүп жатат.
Мобилдик клиникалар 9:00дөн 18:00гө чейин иштейт. Көчмө клиникада дарыгерлер күнүнө 80ге жакын адамды кабыл ала алат. "Дордой" базарынан кийин көчмө клиника Сокулук районунун Шопоков шаарына барат.