БИШКЕК, 17-июл. — Sputnik. Эгер кабат үйлөрдүн курулушу бүгүнкүдөй темп менен уланса, 10-15 жылдан кийин элде турак жай көйгөйү болбойт. Бул тууралуу президент Садыр Жапаров "Кабар" агенттигине берген маегинде билдирген.
Журналист мамлекет башчынын көрүстөндөргө байланыштуу көйгөйлөрдү көтөргөнүнүн себебине кызыккан. Белгилей кетсек, мамлекет башчы мүрзөгө эстелик орнотуп айланасын коруп алууга каршы экенин, көрүстөн турган жерлер кийин колдонулушу керектигин айткан.
Мамлекет башчы жыл сайын айдоо жер азайып бара жатканын белгилеп, муну азыртадан чечип баштабаса келечекте чоң маселе жараларын белгиледи.
"Өлкөнүн 94 пайызын тоолор ээлейт. Түз жерлерибиз болгону 6 пайызды түзөт. Ушул 6 пайыз түз жерлерде айылдар менен шаарлар жайгашкан. Айдоо жер аз. Учурда буудай менен өзүбүздү камсыз кыла албай, импорттоп жатабыз. Жыл өткөн сайын түз жерлер азайып, элдин саны өсүүдө. Ошого жараша тамак-аш көп керектелет. Демек, биз бүгүнкү күн менен жашабашыбыз керек. Ар бирибизде "40-50 жылдан кийин биздин балдарыбыз, келечек муундарыбыз кандай жашайт?" деген санаа болуш керек. Аларга бүгүн кам көрбөсөк, кийин чындап эле алар үчүн чоң баш оору болот", — деген өлкө башчы.
Жапаров ипотекалык насыялоо өнөктүгүнүн максаттарынын бири дал ушул жер тартыштыгын чечүү экенин айткан.
"Мына ошондуктан капталга эмес, бийиктикке өсөлү деп Мамлекеттик ипотекалык компаниянын ишин катуу жандандырдык. Жыл сайын казынадан каражат бөлүп берип жатабыз. Жакынкы жылдарда айылдарга чейин кабат-кабат үйлөрдү курууга жетишебиз. Азырынча үйлөрдү куруу боюнча иштерибиз айрым кичи шаарлар менен райборборлорго жетти. Эгер бийик кабат үйлөрдү куруу иштери бүгүнкүдөй темп менен уланса, 10-15 жылдан кийин Кыргызстандын ар бир жаранында үй көйгөйү болбойт", — деди өлкө башчы.