Бишкекте саат 17-00!Жаңылыктар менен тааныштырып студияда Кенжебай Сатканалиев. Саламатсыздарбы? Бул чыгарылышта:
Акылбек Жапаров быйыл экономикада чоң өзгөрүүлөр башталарын айттыБайден президенттик шайлоодон чыгып кете турган шарттарын атадыСадыр Жапаров мамлекеттик сапар менен Өзбекстанга барат алдыда кененирек.
Президент Садыр Жапаров 18-19-июлда мамлекеттик сапар менен Өзбекстанга барат. Бул тууралуу президенттик администрациянын тышкы саясат бөлүмүнүн башчысы Муратбек Азымбакиев билдирди. Өлкө башчы Өзбекстандын президенти Шавкат Мирзиёев менен эки тараптуу сүйлөшүүлөрдү өткөрөт. "Анда кызматташуу жана алаканы өнүктүрүүнүн келечеги талкууланат. Сапардын алкагында мамлекет башчысы эки өлкөнүн маданият күндөрүнүн расмий ачылышына катышат. Ошондой эле президенттер ишке ашырылып жаткан эки тараптуу долбоорлорду онлайн ишке киргизишет", — деп айтылат маалыматта.Мындан тышкары, кыргыз-өзбек бизнес-форуму жана ректорлордун жыйыны болору кошумчаланды.
Быйыл экономикада чоң өзгөрүүлөр башталат. Бул тууралуу министрлер кабинетинин төрагасы Акылбек Жапаров айтканын өкмөттүн маалымат кызматы билдирди.Ал Экономика жана коммерция министрлигинин биринчи жарым жылдыктын жыйынтыгы боюнча коллегиясынын жыйынына катышкан. "Бул жыл чоң өзгөрүүлөрдүн башталышы болот. Башкача айтканда, белгилүү Азия жолборстору деп аталган Чыгыш Азия өлкөлөрүндөй чоң ийгиликтерге жетебиз деп үмүттөнөбүз. Алардын ийгилиги "жолборс секирик" деп аталса, "илбирстин секиригин" жасап, алдыга жылгыбыз келет", — деген өкмөт башчы. Муну менен катар Акылбек Жапаров сонку жылдары өлкөнүн экономикасы өсүп жатканын белгиледи.
Россиянын Кыргызстандагы элчиси Сергей Вакунов Татарстандын премьер-министринин орун басары Васил Шайхразиев менен жолугушту. Дипломатиялык өкүлчүлүктүн маалымат кызматы билдиргендей, жолугушууда орус-кыргыз аймактар аралык байланыштарын чыңдоо маселелери талкууланды. Билдирүүгө ылайык, Сергей Вакунов маектешине Россиянын аймактарынын ичинен Татарстан Кыргызстандын негизги соода-экономикалык өнөктөштөрүнүн бири болуп саналарын, маданий-гуманитардык жана билим берүү тармагындагы кызматташтык активдүү өнүгүп жатканын белгиледи. Ошондой эле жакында Советтер Союзунун Баатыры, татар акыны Муса Жалилдин эстелигинин ачылышы болуп, 2024-2025-жылдары Татарстан менен Кыргызстандын ортосундагы маданият күндөрүн өткөрүү пландалып жатканына токтолду.
АКШ президенти Жозеф Байден эгерде дарыгерлер ден соолугунан көйгөй тапса президенттик шайлоого катышпай турганын телеканалдардын бирине берген интервьюсунда айткан. Бул туурасында РИА Новости жазды. "Эгерде кандайдыр бир оору болсо, дарыгерлердин ичинен кимдир бирөө келип, сизде ушундай көйгөй бар деп айтса", — деген Байден шайлоодон чыгып кетүү туурасында суроого жооп берип жатып. Ак үйдүн башчысы улгайган курак тартуулай турган нерсе — акылмандык деп эсептээрин айткан. Президент буга чейин анын ден соолугу кошумча текшерүүнү талап кылбастыгын, эгерде керек болсо медиктерге өзү барарын айткан эле. Атаандашы Дональд Трамп менен дебатка чыгып жеңилип калгандан кийин демократтар арасында Байдендин ордуна башка талапкерди сунуштоо туурасындагы чакырыктар айтыла баштады. Партиянын августта өтө турчу съездинде теориялык жактан мындай мүмкүнчүлүк бар, бирок иш жүзүндө эгерде өзү эле баш тартпаса, саясий жарыштан аны четтетүү кыйыныраак болуп калат. Ал эми Байдендин өзүнүн бул өнөктүктө аягына чейин ат салышуу ниети бар. АКШнын президентик шайлоосу 5-ноябрда өтөт.