БИШКЕК, 16-июл. — Sputnik. Жасалма телефондорду колдонуудан коргоо, уурдатпоону жана телефон алдамчылыгын жоюу максатында 25-июнда уюлдук телефондорду идентификациялоонун мамлекеттик системасы ишке киргизилген. Министрлер кабинети бул туурасында кеңири маалымат берди.
Телефонумду азыр катташым керекпи?
Бүгүнкү күндө жергиликтүү байланыш операторлорунун (Mega, Beeline, O!) байланыш кызматтарын (SIM-карталарды) пайдаланган бардык уюлдук телефондор системада автоматтык түрдө каттоодон өткөн. Белгилей кетүүчү нерсе, учурда эл колдонуп жаткан мобилдик телефондорго эч кандай таасири тийбейт.
Телефондорду ким катташы керек?
Сатуу үчүн башка мамлекеттерден алып келинген уюлдук телефондор импорттоочулар тарабынан Кыргызстандын аймагына кирери менен катталууга тийиш. Бул өз кезегинде өлкөнүн ичинде мыйзамдуу түрдө импорттолгон, колдонууга коопсуз IMEI коду* менен катталган уюлдук телефондорду гана сатууга уруксат берилет (анын ичинде дүкөндөр, базарлар жана интернет аркылуу сатуулар бар).
*IMEI код – SIM-карта менен иштеген ар бир чөнтөк телефонго ыйгарылган эл аралык уникалдуу номер. Уюлдук телефондун IMEI кодун телефонуңуздан *#06# деп терип билсе болот.
Кыргызстандын аймагында сатылып жаткан уюлдук телефондорду алган жарандар каттоого муктаж эмес. Азыр айтылып жаткан каттоо талабы сырттан алып келип сата тургандар тарабынан өлкө аймагына кирер замат сатып баштаганга чейин аткарылышы керек.
2024-жылдын 25-июнунан тартып, уюлдук телефонду сатып алардан мурда телефондун IMEI кодун катталгандыгын текшерип алыңыз. Аны www.imei.kg же байланыш операторунун тиркемелери — "Мой Beeline", "Mega 24", "Мой О!" аркылуу билсе болот.
2024-жылдын 25-июнунан тартып Кыргызстандын аймагында уюлдук телефондорду өлкөнүн аймагынан тышкары сатып алган адамдар (мисалы, телефон чет өлкөдөн алынып келинсе же Кыргызстандан тышкары эл аралык базарларда онлайн заказ кылынса, мисалы Wildberries, Ozon, Amazon, Aliexpress ж.б.), 2024-жылдын 25-июнунан тартып аларды www.imei.kg сайтында жарыяланган көрсөтмөлөр боюнча каттоодон өткөрүү керек болот.
Белгилей кетсек, система ишке киргенден кийинки алгачкы эки айда жеке телефондорду каттоо бекер болот.
Жөнөкөй жарандар үчүн системанын артыкчылыктары:
Аппараттарды идентификациялоо жана каттоо жарандардын жеке турмушуна болгон конституциялык укуктарын бузбайт. Мамлекеттик идентификациялоо системасы керектөөчүлөрдүн укуктарын коргоого, бардык коопсуздук чараларын сактоого жана уюлдук телефондордун эл аралык сапат стандарттарына шайкеш келишин камсыздоого багытталат;
Мамлекеттик идентификациялоо системасын киргизүү контрафактылык, кооптуу аппараттардын мыйзамсыз импорттолушун жокко чыгарат, бул аккумулятордун жарылуусу жана сапатсыз аппараттардын техникалык бузулуу тобокелдиктерин жок кылат;
Система ишке киргизилгенден кийин алдамчылык жана террордук максаттарда колдонулгон телефондор система тарабынан бөгөттөлөт;
Мамлекеттик идентификациялоо системасы телефондук алдамчыларды, ууруларды кыскартууга олуттуу таасирин тийгизет, анткени жарандар укук коргоо органдарына кайрылганда система мындай түзүлүштөргө бөгөт коюп, өлкө аймагында аларды андан ары колдонууга же жайылтууга жол бербейт.
Көбүрөөк маалымат алуу үчүн www.imei.kg сайтына кириңиз.