БИШКЕК, 15-июл. — Sputnik. Нөшөрлөп жааган жамгырдын кесепетинен сел эң көп катталган Ош облусунун Кара-Суу, Алай, Араван, Өзгөн, Ноокат райондору, Баткен облусунун Лейлек, Кадамжай жана башка райондордо жолдорду калыбына келтирүү, тазалоо иштери уланууда. Бул тууралуу Транспорт жана коммуникациялар министрлигинин маалымат кызматы билдирди.
Учурда жабык жолдор:
Жалал-Абад — Казарман — 63-98-чакырымдар аралыгы;
Ноокат — Араван — 9-чакырымы,
Мырзаке — Кара-Шоро — 49-51-чакырымдар аралыгы;
Бул жолдордо бир тараптуу каттам берилди:
Ак-Терек — Папан — Кожокелең — 1-чакырымы;
Ош — Төлөйкөн — 7,4 жана 8,5-чакырымы;
Топ-Жаңгак — Кара-Суу, Тамаша — Кызыл-Булак — 7 жана 16-17-чакырымдар аралыгы;
Бишкек — Ош — 660-чакырымы;
Ош — Баткен — Раззаков — 63 жана 57-58-чакырымдар аралыгы;
Ош — Сары-Таш — Эркеч-Там — 42-44-чакырымдар аралыгы.
Азыркы тапта бир тараптуу каттам берилген жолдорду кеңейтүү, суу жеп кеткен тилкелерди калыбына келтирүү иштери жүрүүдө.
Эске сала кетсек, кечээ нөшөрлөп жааган жамгырдан улам Ош жана Баткен облустарында сел жүрүп, бир катар жолдорду алып кеткен. Суу ташкынынан жабыркагандардын көбү Ош шаарында. Ал жакта Ак-Буура суусу ташып, адамдарды агызып кеткен. Акыркы маалыматтар боюнча бирөө каза болгон, төртөө изделүүдө.