БИШКЕК, 13-июл. — Sputnik. Борбор калаада ири өлчөмдө алдамчылыкка шектелген 31 жаштагы киши кармалганын Бишкек шаардык ички иштер башкы башкармалыгынан билдиришти.
Шектелген 31 жаштагы киши
© Фото / пресс-служба ГУВД Бишкека
Өткөн жылдын 12-июнунда А.И. аттуу жаран милицияга арыз менен кайрылган. Ал М.У. аттуу адам 2022-жылы жабырлануучунун ишенимине кирип, оор жүк ташуучу унаа сатып алууга жардам берем деп 40 миң долларын алган бойдон изин суутуп кеткенин айткан.
Милиция бул факт боюнча Кылмыш-жаза кодексинин 209-беренеси менен ("Өзгөчө ири өлчөмдөгү алдамчылык") кылмыш ишин козгоп, шектүүнү убактылуу кармоочу жайга киргизген.
"Анын ушул сыяктуу башка кылмыштарга да катыштыгы бар экендигин аныкталып, келтирилген жалпы зыян 129 миллион сомду түздү", — деп айтылат маалыматта.
Жогоруда айтылган кылмышка шектүү кишиден жабыркагандар болсо милицияга (0706) 10-21-02, 102 телефондору аркылуу кабарлап койсо болот.