БИШКЕК, 12-июл. — Sputnik. Министрлер кабинетинин төрагасы Акылбек Жапаров "Кыргызстандын улуттук электр тармагы" ачык акционердик коомуна 30 даана атайын техника тапшырды. Бул тууралуу өкмөттөн билдиришти.
Маалыматка ылайык, бул техникалар аймактык бөлүмдөргө жөнөтүлөт. Жапаров 3-4 жылда республика электр энергиясы менен толук камсыздалып, экспортко чыгат деген ишенимин билдирди.
"Техниканы сатып алууга 180 миллион сом бөлүнгөн. Быйыл 271 миллион сомго 65 даана атайын техника сатып алынды. Кара-Кыргыз автономдуу облусунун түзүлгөндүгүнүн 100 жылдыгын белгилөөнүн алкагында 100 ишкана ачылат. Алардын баары үзгүлтүксүз электр энергиясы менен камсыз болгондо гана иштей алат. Өлкөбүздүн экономикасынын өнүгүшү сиздердин эмгегиңиздерден көз каранды", — деди Жапаров.
Энергетика министри Таалайбек Ибраевдин айтымында, жакынкы аралыкта Кыргызстанга 600 миң эсептегич, 1000 трансформатор (ар бир бөлүштүрүүчү зонага 17ден) алынып, 300 чакырым кабель тартылат.