БИШКЕК, 11-июл. — Sputnik. Кыргызстанда жол эрежесин бузгандарды дрон менен көзөмөлдөй башташты. Бул тууралуу Жол кыймылы коопсуздугун камсыздоо башкы башкармалыгынан билдиришти.
Маалыматка ылайык, программаны Бишкек — Нарын — Торугарт жолунда байкап көрүшүүдө.
Дрондор Ысык-Көл, Нарын тарапка кеткен айланма жолдо учуп, каршы тилкеге чыккандарды, катуу айдагандарды тартып алууда. Эреже бузгандарга протоколду дрон учкан жерден бир-эки чакырым аралыкта турган Кайгуул милициясынын кызматкерлери жазып берет.
ЖКККББ долбоор байкоодон (тесттик режим) өтүп жаткан учурда айып пул салынбай турганын белгиледи. Бирок инспекторлор эреже бузгандарды токтотуп, түшүндүрүү иштерин жүргүзөт.