БИШКЕК, 10-июл. — Sputnik. НАТОнун Вашингтондогу саммитинин алгачкы күнү альянстын агрессивдүү мүнөзүн көрсөттү. Россия тарап тынчтык тууралуу бир дагы сөз уккан жок. Бул тууралуу РФтин АКШдагы элчиси Анатолий Антонов билдиргенин РИА Новости жазды.
"НАТО саммитинин биринчи күнүндө АКШ жана анын жандоочулары милитаризмди жана аскердик экспансияны үгүттөөнү улантышты", — деди ал журналисттерге.
Антоновдун айтымында, Батыш өлкөлөрү авторитардык буйруктарды таңуулоону токтотпой келет. Ошондой эле Россияны Украинанын жардамы менен талкалай албастыгына көзү жетип, үчүнчү дүйнөлүк согушка жол ачып жатышат. Саммиттин биринчи күнүндө Россия тынчтык тууралуу бир дагы сөз уккан эмес.
"Түндүк атлантикалык альянс бизди жек көрсөтүү менен өз коомчулугун коркутууда. Мындай жол менен алар Киевди колдоого короткон каражаты бекерге кетпегенин далилдегиси келет", — деди дипломат.
Антонов Батыш өлкөлөрүнүн саясаты азыртан эле Глобалдык Түштүк менен Чыгыш мамлекеттеринин жүз буруп кетишине себеп болуп жатканын белгиледи.
Түндүк атлантикалык альянстын юбилейлик 75-саммити шейшембиден бейшембиге чейин Вашингтондо өтөт. Bloomberg менен Financial Times белгилегендей, альянстын эң ири мүчөлөрү кейиштүү абалда турганда иш-чара көлөкөдө калат.