Бишкекте саат 15-00!Жаңылыктар менен тааныштырып студияда Кенжебай Сатканалиев. Саламатсыздарбы? Бул чыгарылышта:
Эл аралык фонд Кыргызстандын экономикасы кандай өсөрүн божомолдодуТаштандыны туура эмес жерге ыргыткандарга айып салынат"Альфа Телекомдун" жетекчиси алмашты алдыда кененирээк
«Альфа Телеком» ишканасынын башкы директору болуп Элнар Субакожоев дайындалды. Мындай чечим Мамлекеттик өнүктүрүү банкынын 10-июлдагы кезексиз жыйынында кабыл алынганын жергиликтүү басылмалар жазып чыгышты. Элнар Субакожоев 2021-жылдан бери Мегакомдун коммерциялык блогун башкарган. Мамлекеттик байланыш агенттигинин жетекчиси, “Манас” эл аралык аэропортунун коммерциялык директору болгон.2023-жылдын сентябрынан бери Альфа Телекомду Айбек Күрөңкеев жетектеп келген, ал ээлеген кызматынан өз каалоосу менен кеткени айтылды.
Евразия турукташтыруу жана өнүктүрүү фонду аймактык баяндамасында мүчө мамлекеттердин экономикасында алдыдагы 2,5 жылда кандай өсүү болорун божомолдоду. Тышкы экономикалык абал жагымдуу болгон шартта жана I кварталдын маалыматын эске алуу менен Евразия турукташтыруу жана өнүктүрүү фонду мүчө мамлекеттерде экономикалык көрсөткүч жазгы божомолго салыштырмалуу жогору боло турганын билдирүүдө. Россия экономикасынын 3,4 пайызга өсүшү региондогу мамлекеттердин экспорт жана инвестициясына оң таасир этет. Мындан тышкары, эмгек мигранттарынан которулган каражат да жогорулай турганы айтылат. Экономикалык өсүшкө нефть, алтын, металлдардын көбү жана калий жер семирткичтердин кымбатташы да өбөлгө болот. Маалыматка ылайык, ички дүң өнүмдун көлөмү Арменияда — 6,3 пайыз, Беларуста — 3,7, Кыргызстанда 4,8, Тажикстанда 7,6 пайызды түзөт. Казакстандын экономикасы экинчи жарым жылдыктан баштап өсүү жолуна түшүп, жыл жыйынтыгы менен 4,3 пайызга жетет.
Бишкек мэриясы туура эмес жерге таштанды ыргыткандар айыпка жыгыларын эскертти. "Таштандыны атайын урналарга гана салуу керек. Же болбосо аны алып кетүү үчүн "Тазалык" муниципалдык ишканасынын атайын техникасы барган күндөрү гана сыртка чыгаруу зарыл", — деп жазылат маалыматта. Таштандыны туура эмес ыргыткандарга 5000 сомдон 17 000 сомго чейин айып салынат. Өндүрүш, өнөр жай таштандыларын жана медициналык калдыктарды белгиленбеген жерлерге таштагандар 7 500 сомдон 23 000 сомго чейин айып пул төлөйт.
НАТОнун Вашингтондогу саммитинин алгачкы күнү альянстын агрессивдүү мүнөзүн көрсөттү. Россия тарап тынчтык тууралуу бир дагы сөз уккан жок. Бул тууралуу Россиянын АКШдагы элчиси Анатолий Антонов билдиргенин РИА Новости жазды. "НАТО саммитинин биринчи күнүндө АКШ жана анын жандоочулары милитаризмди жана аскердик экспансияны үгүттөөнү улантышты", — деди ал журналисттерге. Антоновдун айтымында, Батыш өлкөлөрү авторитардык буйруктарды таңуулоону токтотпой келет. Ошондой эле Россияны Украинанын жардамы менен талкалай албастыгына көзү жетип, үчүнчү дүйнөлүк согушка жол ачып жатышат. Саммиттин биринчи күнүндө Россия тынчтык тууралуу бир дагы сөз уккан эмес. Антонов Батыш өлкөлөрүнүн саясаты азыртан эле Глобалдык Түштүк менен Чыгыш мамлекеттеринин жүз буруп кетишине себеп болуп жатканын белгиледи. Түндүк атлантикалык альянстын юбилейлик 75-саммити шейшембиден бейшембиге чейин Вашингтондо өтөт.