БИШКЕК, 8-июл. — Sputnik. Өкүлдөр палатасынын бир катар демократтары АКШ президенти Жо Байденди 2024-жылдагы президенттик шайлоого катышуудан баш тартууга чакырды. Бул тууралуу РИА Новости CNN телеканалына шилтеме берип жазды.
"Өкүлдөр палатасынын бир катар мүчөлөрү жекшемби күнү демократиялык азчылыктын лидери Хаким Жеффриске телефон чалып Жо Байден 2024-жылдагы президенттик шайлоо өнөктүгүнө катышуудан баш тартышы керектигин айтышты", — деди телеканал өз булактарына таянуу менен.
Конгрессмендер Жеффрис менен баарлашууда эгер Байден жарышка катышууну уланта берсе, демократтарга зыян келтириши мүмкүн экенин айтышкан. Алардын ою боюнча, партия өкүлдөрүнө Эл өкүлдөр палатасынын кийинки шайлоосунда көпчүлүк добуш алууга тоскоолдук жаралышы мүмкүн. Жеффрис болсо Байдендин келечеги тууралуу пикирин билдирген жок.
Ошол эле учурда Байдендин шайлоо кампаниясына катышуусун колдогондорго караганда өнөктүктөн чыгышын жактаган демократ-конгрессмендер көп болду. CNN басылмасынын маалымат булактары президентке каршы чыккандардын арасында Марк Такано, Адам Смит, Жим Химс, Жо Моррелл жана Сюзан Уайлд бар экенин айткан.
Маалымат булактын бири телеканалга билдиргендей, көптөр Байдендин ордуна АКШнын вице-президенти Камала Харристи аташкан.
Эскерте кетсек, Жо Байден менен Дональд Трамптын алгачкы дебаты 28-июль күнү Атланта шаарында болгон. Байден анда такалып, оюн топтой албай, атаандашына тийиштүү деңгээлде туруштук бере алган эмес. Ал эми иш-чарадан соң тепкичтен жубайы түшүрүп кеткен.
Эми саясатчылар менен журналисттер демократтар Байденден баш тартып, анын ордуна башка талапкерди коюшу мүмкүн деп жатышат. Теориялык жактан алганда, август айында өтө турган курултайда партия мындай мүмкүнчүлүккө ээ болот. Бирок праймериз шайлоодо жеңишке жеткен Байден өзү баш тартмайынча аны жарыштан четтетүү иш жүзүндө кыйын.
Байден менен Трамптын экинчи дебаты 10-сентябрга белгиленген. АКШда президенттик шайлоо 5-ноябрда өтөт.