Өлкөдө 20-апрелден 1-июлга чейин 236 ирет сел жүргөн. Бул тууралуу ӨКМдин жарандык коргонуу бөлүмүнүн улук офицери Кубаныч Темирбек уулу Sputnik агенттигине билдирди.Анын айтымында, бул убакыт аралыгында Ошто 71, Баткенде 66, Жалал-Абадда 61, Таласта 11, Чүйдө 13, Нарында үч, Ысык-Көлдө беш жана Ош шаарында алты ирет сел жүргөн. Жалпысынан 404 турак жай, 53 соцобъект, 352,3 чакырым унаа жол талкаланган. Тилекке каршы, аталган мезгилде тилсиз жоо 17 адамдын өмүрүн алды. Алардын 15и Ош облусунун тургундары болсо, Жалал-Абад менен Баткен аймактарында бирден адам каза болгон. Темирбек уулу эки ай ичиндеги жаратылыш кырсыктары 172 миллион 956 миң сомдук чыгымга учуратканын кошумчалады.
Өлкөдөгү интернеттин сапатын жакшыртуу үчүн Кыргызстан Кытайдын China Telecom Global Limited компаниясы менен кызматташат. Бул тууралуу Санариптик өнүктүрүү министрлигинен билдиришти. Маалыматка ылайык, Кыргызстандын санариптик өнүктүрүү министринин орун басары Сергей Слесарев жана "Кыргызтелеком" ААКтын башкы директору Нурлан Мадаминов башында турган расмий делегация Кытайга иш сапары менен барып, тиешелүү меморандумга кол коюлган. "Долбоордун негизинде интернеттин өткөрүү жөндөмдүүлүгүн жогорулата турган жаңы жабдуу орнотуу каралууда. Муну менен Кыргызстандын байланыш тармагы үчүн резервдеги канал пайда болмокчу", — деп жазылат маалыматта. Санариптик өнүктүрүү министрлиги Россия жана Казакстан менен түзүлгөн негизги интернет-канал ошол бойдон каларын айтып, жаңысы байланыштын, интернеттин сапатын азыркыдан жакшыртарын кошумчалаган.
Кыргызстанга импорттолгон канттын 99,7 пайызы Евразия экономикалык биримдигине кирген мамлекеттерден келет. Бул тууралуу Улуттук статистика комитетинин январь-апрель айларына берген маалыматында жазылган. Бул аралыкта өлкө 23 миң 819 тонна кант импорттогон. Кумшекер саткан мамлекеттер: Россия — 23 миң 119,7 тонна; Беларусь — 604,2 тонна; Индия — 61; Казакстан — 24,3; Иран — 5,8; Польша — 2,7; Түштүк Корея —1,1 тонна.Бельгия, Германия, Франциядан да чакан партиялар келген. Былтыр ушул мезгилде 21,2 тонна кумшекер алып келинген.
Украина 20 миллиард долларлык коммерциялык карызынан улам расмий жарыяланбаганы менен дефолт абалына тушукту. Бул тууралуу Жогорку Раданын депутаты Нина Южанина билдиргенин РИА Новости жазды. Дүйшөмбү күнү британиялык Economist басылмасы Украина бийлиги кредиторлор менен карызын реструктуризациялоо боюнча макулдаша албаса өлкө дефолтко кабылганын августта жарыялашы мүмкүн экенин боолгологон.Анын айтымында, Радада элдин реакциясын байкооо үчүн салыкты жогорулатып көрүү ыктымалдуулугу айтылууда. Зеленскийдин кеңсеси бул маселени карап жатат, бирок элдин маанайынан чочулап коомчулукка чыгара элек. Financial Times Жогорку Раданын бюджет комитетинин төрайымы Роксолана Пидласуга таянып жазгандай, Украина жылдык бюджетинин тең акчасы болгон 87 миллиард долларды коргонууга жумшаган, анткен менен ички керектөөсү болгону 46 милиардды түзөт.