БИШКЕК, 2-июл. — Sputnik. Садыр Жапаров жана БУУнун баш катчысы Антониу Гутерриш бейформал жолугушуу өткөрүштү. Бул тууралуу президенттин маалымат кызматынан кабарлашты.
Билдирүүгө ылайык, алгач алар Ысык-Көлдү бойлото теплоход менен сейилдеген.
“Антониу Гутерриш “Номад” этнокомплексиндеги этномаданий программа менен таанышты. Улуттук стилде жасалгаланган боз үй шаарчасы кыргыз улуттук кол өнөрчүлүгүнүн ар түрдүүлүгүн көрсөттү. Кол өнөрчүлөрдүн эмгектери менен таанышуу учурунда мамлекет башчы Антониу Гутерришке ак калпакты белекке берди. Жогорку даражалуу коноктор үчүн ат оюндары, жаа атуу, тайгандар жана бүркүттөр менен мергенчилик уюштурулду”, — деп айтылат маалыматта.
Маданий иш-чара концерттик программа менен жыйынтыкталганы кошумчаланды.
Эске салсак, БУУнун баш катчысы Антониу Гутерриш 3-июлга чейин иш сапары менен Кыргызстанда болот. Ал өлкө башчы Садыр Жапаровдун чакыруусу менен келген.