Кыргызстан Бирикен Улуттар Уюмунун Коопсуздук кеңешин реформалоону колдойт. Бул тууралуу тышкы иштер министри Жээнбек Кулубаев билдирди. Анын айтымында, бул — көп жылдардан бери көтөрүлүп келе жаткан маселердин бири. "БУУнун Коопсуздук кеңешин реформалоо — уюмдун ассамблеясынын негизги темаларынын бири. Аталган маселе бардык деңгээлде талкууланып келе жатат. Бул — өтө татаал маселе. Япония, Германия, Индия сыяктуу мамлекеттер БУУнун Коопсуздук кеңешине мүчө болгусу келет, алардын өз көз карашы бар. Анткен менен реформалар Коопсуздук кеңешинин дайымкы мүчөлөрүнүн макулдугу менен гана ишке ашат. Маселе 20 жылдан ашык убакыттан бери талкууланууда, балким, дагы талкууланат чыгар. Кыргызстан БУУнун Коопсуздук кеңешинин реформасын жактайт", — деди Кулубаев. Ошондой эле ал Кыргызстан Коопсуздук кеңештин туруктуу эмес мүчөсү болсо анын реформаларына өз салымын кошо аларын кошумчалады.
Кыргызстандагы чокулардын бирине Бириккен Улуттар Уюмунун аты берилди. Бул тууралуу президент Садыр Жапаров БУУнун баш катчысы Антониу Гутерриш менен Чолпон-Атада жолуканда билдирди.Анын айтымында, өлкөдө 158 чоку жана 9 959 мөңгү бар. Акыркы 50 жылда мөңгүлөр 1 262 чарчы чакырымга азайган."Мөңгүлөрдүн эрүү көйгөйүнө көбүрөөк маани берүү жана дүйнөдө тынчтыкты, коопсуздукту чыңдаш үчүн талыкпай эмгектенип БУУнун кызматкерлерине урмат көрсөтүү үчүн Кыргызстандын тоо кыркасындагы чокуга Бирикен Улуттар Уюму деген географиялык аталышты ыйгаруу тууралуу атайын жарлык кабыл алдым", — деди мамлекет башчы. Андан кийин өлкө башчы тиешелүү сертификатты Антониу Гутерришке тапшырды.Аталган чоку Ысык-Көл облусундагы Түштүк Эңилчек мөңгүсүнүн жанындагы Сары-Жаз тоосунда жайгашкан. Бийиктиги 5 576 метр.
Билим берүү министрлиги мектеп жетекчилеринин бош кызмат орундарына сынак жарыялады. Бул тууралуу аталган ведомстводон билдиришти. Маалыматка ылайык, документтер 15-июлга чейин кабыл алынат. Талапкер бир гана мектепке башчы болууга документ жөнөтө алат, ошондой эле бир мектепти 10 жыл башкарган адам конкурска катыша албайт. Талап кылынган документтер жеке электрондук почта аркылуу тиешелүү облустун электрондук дарегине жөнөтүлүшү керек.Министрлик документтер толук же так эмес болсо сынакка катыштырбай коюуга негиз болорун кошумчалады.
Украина 20 миллиард долларлык коммерциялык карызынан улам расмий жарыяланбаганы менен дефолт абалына тушукту. Бул тууралуу Жогорку Раданын депутаты Нина Южанина билдиргенин РИА Новости жазды. Дүйшөмбү күнү британиялык Economist басылмасы Украина бийлиги кредиторлор менен карызын реструктуризациялоо боюнча макулдаша албаса өлкө дефолтко кабылганын августта жарыялашы мүмкүн экенин боолгологон. Анын айтымында, Радада элдин реакциясын байкооо үчүн салыкты жогорулатып көрүү ыктымалдуулугу айтылууда. Зеленскийдин кеңсеси бул маселени карап жатат, бирок элдин маанайынан чочулап коомчулукка чыгара элек. Financial Times Жогорку Раданын бюджет комитетинин төрайымы Роксолана Пидласуга таянып жазгандай, Украина жылдык бюджетинин тең акчасы болгон 87 миллиард долларды коргонууга жумшаган, анткен менен ички керектөөсү болгону 46 милиардды түзөт.