БИШКЕК, 1-июл. — Sputnik. Кара-Кулжада сел агызып кеткен үй-бүлө башчысы ИИМдин Күзѳт кызматынын кызматкери болгон. Бул тууралуу Ош ОИИББ билдирди.
Маалыматка караганда, А.Р. 36 жашта, ал эми келинчеги Ж. кызы А. 34 жашта болгон. Аларды 12 жаштагы, төрт жаштагы уулдары менен сел агызып кеткен.
Издөө иш-чараларынын натыйжасында үй-бүлөнүн атасы, апасы жана 12 жашар уулунун сөөгү табылып, туугандарына өткөрүп берилди. Төрт жаштагы баласы изделүүдө.
Ал эми аман калган 8 жаштагы А. аттуу кызы ооруканага жеткирилген.
Эске салсак, түндө райондун Жетим-Дөбө айылында жүргөн сел Daewoo Matiz унаасында бараткан беш адамды (аялы, күйөөсү, эки уулу жана кызы) агызып кеткен. Атасы кызын куткарып, калгандарына келгенде өзү кошо агып кеткени кабарланган.