БИШКЕК, 29-июн. — Sputnik. Иранда президенттик шайлоонун экинчи туру 5-июлда өтө турганын өлкөнүн шайлоо комиссиясынын өкүлү Мохсен Эслами билдирди. Бул тууралуу РИА Новости жазды.
"Талапкерлердин бири да жетиштүү добуш ала албагандыктан, майзам боюнча, шайлоонун экинчи туру өтөт. Ал өлкө боюнча жума күнү, 5-июлда, болот", — деген Эслами.
Иранда президенттик шайлоо өткөн жума күнү, 28-июнда, өткөн.
IRNA агенттигинин маалыматы боюнча, 24,5 миллион шайлоочунун добушу эсептелген. Биринчи турдун жыйынтыгында реформачыл Масуд Пезешкиан 10,4 миллион добуш алып, алдыга чыккан. Анын башкы атаандашы Саид Жалили бир миллион добушка артта калган. Ал эми үчүнчү орунга 3,3 миллион шайлоочунун добушун алган Мохаммад Багер чыкты. Эң акыркы сапта 206 миң добуш менен Мостафа Пурмохаммади турат.
Иранда президенттик шайлоодо жеңишке жетүү үчүн кеминде шайлоочулардын 50 пайызынын добушун алуу керек. Эгерде талапкерлердин бири да жетишерлик добушка ээ болбосо, анда шайлоого алдыдагы эки талапкер ат салышат.
Президенттик так үчүн ат салышууга алгач алты киши катталып, Тегерандын мэри Алиреза Закани менен Ардагерлер жана шейиттер иши фондунун башчысы Амир-Хосейн Газизаде-Хашеми парламент спикери талапкерлигин Мохаммад Багер Галибаф менен аятолланын Улуттук коопсуздук жогорку кеңешинин өкүлү Саид Жалилинин пайдасына катышпай турган болушкан. Булардан тышкары, өлкөнү башкаруу укугу үчүн мурунку ички иштер министри Мостафа Пурмохаммади менен мурунку саламаттык сактоо министри жана медициналык билим берүү министри Масуд Пезешкиан күч сынашып жатат.
Иранда президент — аятолладан кийинки бийлик башындагы адам. Анын ыйгарым укуктарына Конституциянын жоболорун ишке ашыруу жана аткаруу бийлигин жетектөө кирет. Жаңы президенттин ишинен Ирандын тышкы саясатынын багыты аныкталат.