Россиянын президентинин Азия өлкөлөрүнө болгон иш сапарынын жылуу кабыл алынышы, анын ичинен Түндүк Корея менен маанилүү келишимге кол коюлушу Батышты кыжырдантууда. Мындай пикирин Токон Мамытов Sputnik Кыргызстан радиосуна маек куруп жатып билдирди.
Анын айтымында, эки Корея мамлекетинин мамилеси Владимир Путиндин иш сапарынан кийин солгундап кетпейт.
"Россия лидеринин Түндүк Кореяга болгон иш сапарында сырттан келген агрессияда эки тарап бири-бирине көмөктөшө тургандыгы тууралуу документке кол коюлду. Бул АКШга, албетте, жакпай турат. Андыктан дүйнө коомчулугуна "Путиндин иш сапары Пхеньян менен Сеул алакасына терс таасирин тийгизет" деген сыяктуу сөз таратууга далалаттанып жатат. Бирок мындай пикирди карманган эксперттер бир нерсени ойго албай жатышат. Алты жыл мурда Түндүк Корея менен Түштүк Кореянын президенттери эки өлкө чек арасында жолугуп, кучакташа көрүшүп ынтымакка келишкенин баарыбыз билебиз. Мындай жолугушуулар бир нече жолу кайталанган. Ошондон бери эки бир тууган мамлекет эч кандай конфликтиге барбай келишилген макулдашууларын так аткарууда. Арийне чек арада майда-чүйдө чатактар болуп калышы ыктымал, бирок андай учурлар АКШ менен Мексиканын ортосунда тынбай эле болуп жатпайбы. Андыктан мындан ары бул эки өлкө бири-бири менен чоң чыр-чатакка барбай турганын түшүнүшүбүз керек. Демек, Пхеньян менен Сеулдун мына ушундай келишиминен бир нече жылдан кийин гана барган Путиндин иш сапары алардын ички мамилесине терс таасирин тийгизбейт. Бул жөн гана айрым Батыш эксперттеринин коомчулуктун пикирин бурууга жасаган далалаты боюнча кала берет. Себеби учурда Россия, КЭДР жана КЭР биригип, коргонуучу мүнөздөгү аскерий доктрина түзүп жатат. Бул аракеттер бир эле ушул мамлекеттерге эмес, дүйнө калкы үчүн маанилүү",— деди Мамытов.
Ал мындай коргонуучу доктрина курууга Батыш мамлекеттери өзү түрткү берип, АУКУС сыяктуу уюм түзүп Чыгыш мамлекеттеринин коопсуздугун коркунучка кептегенин кошумчалады.