"Буга чейин окуучуларды 5-класстан эле кабыл алып келсек, былтыртан баштап 1-класска кабыл алуудабыз. Бул жагынан өкмөт интерактивдүү төрт доска жана музыкалык аппараттарды берип колдоого алууда. Шартыбыз заман талабына жараша жакшырып жатканына кубанычтабыз. Бирок дагы да муктаждыктарыбыз бар. Имаратыбыз да эски болгондуктан мамлекетти эле карап отурбастан, өзүбүз акырындап оңдоп келе жатабыз. Бүгүн жаңылануу, өзгөрүүнүн үстүндө иштөө керек. Биздин окуу жайга кабыл алуу эки этаптан турат. Биринчи этапта комиссия балдардын шыгын, талантын карайт. Экинчи этапта медициналык кароодон өтөт. Окутуу үч багытта жүрөт. Биринчиси профессионалдык, экинчиси жалпы билим берүү, ал эми үчүнчүсү музыкага үйрөтүү. Группада 12 баладан ашпашы керек. Башталгыч класстарда кадимки мектеп программасы менен катар эле гимнастикага үйрөтүлөт. 5-класстан баштап классика бийлерине басым жасалат. Ал эми 9-классты кадимки мектептен бүтүп келген балдар балет эмес, "Хореография искусствосу" адистигинин "Элдик бий ансамблинин артисти" квалификациясына тапшыра алышат. Алардын мурдатан ар кандай бий топторунда, ансамблдерде бийлеп жүргөнүнө басым жасайбыз. Диплом, сертификаттары каралат", — деди Кыдыков.