БИШКЕК, 26-июн. — Sputnik. Мамлекеттик Думанын Крым аймагынан шайланган депутаты Леонид Ивлев НАТОнун башкы катчысынын алмашышынан эч нерсе деле өзгөрүп кетпей турганын айткан.
Эске салсак, шаршембиде НАТО Марк Рюттени кийинки башкы катчы кылып бекитти. Эми ал аталган уюмду төрт жыл башкарат. Рютте милдетине 2024-жылдын 1-октябрынан тарта киришмекчи.
"Марк Рюттенинин дайындалышы Европа коомчулугуна математикалык коммутативдик мыйзам колдонсо боло турган учур. Орун алмашканы менен сумма өзгөрбөйт", — деген Ивлев.
Анын айтымында, декларациялар, билдирүүлөрдөн сырткары НАТО эч нерсе чечпейт.
"Баары Вашингтон, Пентагондо чечилет. Тагыраагы, ири кирешенин арытнан кууп, снаряд, бомба, ракета чыгарган, Севастополдун пляждарын, Крым, Новороссия жана Россиянын түштүгүндөгү тынч жаткан шаар, айылдарды аткылаган АКШнын өнөр жайы. Андыктан Россиянын Куралдуу күчтөрүнүн кубаттуулугун арттыруу милдети фашисттик Киев режимин жеңүү багытында өтө актуалдуу бойдон калууда", — деп кошумчалаган депутат.
Башкы катчынын алмашканы боюнча ДЭР башчысы Денис Пушилин да пикирин айткан.
Бул орун алмашуулардан кийин альянстын Россияга, Украинага жардам көрсөтүү жаатында өзгөрүүлөр болобу деген суроого жооп берген. Ал "тилекке каршы, өзгөрүү болбой турганын, ысымдар өзгөрүшү ыктымалдыгын, бирок Батыш РФке карата агрессиялуу болуп жаткандыктан азыркыдан башкача мамиле болбостугун" белгилеген.
Россия Украинага Батыштын курал-жарак берүүсү кырдаалды жөнгө салбастыгын жана НАТО өлкөлөрүн чатакка аралаштырып, "от менен ойноп" жатканын айтып келет. РФ ТИМинин жетекчиси Сергей Лавров Украинага делген жүктүн бардык түрү Россия үчүн мыйзамдуу бутага айланарын эскерткен.
Ал билдиргендей, АКШ жана НАТО Украинаны курал-жарак менен камсыздап жаңжалга түздөн-түз катышкандан тышкары Улуу Британия, Германия, Италия жана башка өлкөлөрдө адистерди даярдоо менен да алек болушууда. Кремль Батыш тараптын Украинаны курал менен камсыздоосу сүйлөшүү жолуна алып келбей турганын, тескерисинче, мындан терс натыйжа чыгарын айткан.