БИШКЕК, 17-июн. — Sputnik. НАТО өзүнүн өзөктүк куралдарын (дүрмөттөрүн) согуштук даярдыкка келтирүүнү талкуулап жатат. Бул туурасында НАТОнун башкы катчысы Йенс Столтенберг британиялык Telegraph басылмасына маек куруп жатканда айтканын РИА Новости жазды.
"Өзөктүк канча куралдардын дүрмөттөрү даярдалышы керектиги туурасында ачыктап айтпайм.., бирок бул маселе боюнча сүйлөшүүбүз керек. Биз кыла турган нерсе ушул", — деп альянстын башкы катчысы айтканын басылма билдирди.
Столтенбергдин айтымында, Түндүк атлантикалык альянс душманына сес көрсөтүп, белги бериш үчүн дүйнөгө куралдарынын арсеналын көрсөтүшү керек. НАТОнун баш катчысы Кытай өзөктүк куралга инвестицияны аянбай салып жатканын кошумчалган. Анын айтымында, аталган жааттагы дүрмөттөр 2030-жылга карата миңге жетип калат.
Мындай кадам Кытай, Россия тарабынан өсүп келе жаткан "кооптуулуктан" улам жасалып жатат деген актануусун айткан.
"Бул келечекте, көп узабай эле кыязы, НАТОнун мурда бет келбеген потенциалдуу эки өзөктүк каршылашы — Кытай, Россия менен кагылышынан кабар берет. Албетте, анын кесепети тиет", — деп жазган басылма Столтенбергдин айтканын.
Россия лидери Владимир Путин мурдараак Петербургдагы экономикалык форумда Москва өзөктүк курал менен коркутпастыгын айтып, бирок аларды колдонуу маселесине жеңил көз караш менен мамиле жасабаш керектигин эскерткен.
Россия теориялык жактан өзөктүк куралды колдонушу мүмкүндүгүнүн сценарийлери россиялык аскердик доктринада жана "Өзөктүк куралды ооздуктоо жагындагы мамлекеттик саясаттын негиздеринде" жазылган. Анда Россияга же анын союздаштарына каршы массалык кыргын салуучу курлдарды колдонгон же катардагы куралды пайдаланган агрессия жаралып, мамлекетке кооптуулук келсе аталган кадамдар ташталышы мүмкүндүгү белгиленген.