БИШКЕК, 17-июн. — Sputnik. Россия президентинин маалымат катчысы Дмитрий Песков НАТОнун башкы катчысы Йенс Столтенберг альянстын өзөктүк куралдарын согушка даярдоо кырдаалдын кезектеги чыңалуусун жаратарын айтты. Бул туурасында РИА Новости жазды.
"Бул кырдаалдын кезектеги чыңалуусун жаратат", — деген Песков журналисттердин Столтенбергдин билдирүүсүнө Кремль кандай баа берет деген суроосуна жооп кылып жатып.
Мурдараак Столтенберг британиялык Telegraph басылмасына НАТО өзүнүн өзөктүк куралдарын (дүрмөттөрүн) согуштук даярдыкка келтирүүнү талкуулап жаткандыгы боюнча айтканы жарыяланган.
Башкы катчынын пикиринде, Түндүк атлантикалык альянс душманына сес көрсөтүп белги бериш үчүн дүйнөгө куралдарынын арсеналын көрсөтүшү керек. Мындан сырткары, Кытай өзөктүк куралга инвестицияны аянбай салып жатканын кошумчалаган. Анын айтымында, аталган жааттагы дүрмөттөр 2030-жылга карата миңге жетип калат.
Ал эми Россия лидери Владимир Путин мурдараак Петербургдагы экономикалык форумда Москва өзөктүк курал менен коркутпастыгын айтып, бирок аларды колдонуу маселесине жеңил көз караш менен мамиле жасабаш керектигин эскерткен.
Россия теориялык жактан өзөктүк куралды колдонушу мүмкүндүгүнүн сценарийлери россиялык аскердик доктринада жана "Өзөктүк куралды ооздуктоо жагындагы мамлекеттик саясаттын негиздеринде" жазылган. Анда Россияга же анын союздаштарына каршы массалык кыргын салуучу курлдарды колдонгон, же катардагы куралды пайдаланган агрессия жаралып, мамлекетке кооптуулук келсе аталган кадамдар ташталышы мүмкүндүгү белгиленген.