БИШКЕК, 13-июн. — Sputnik. Россиянын Казань шаарында өтө турган БРИКС-2024 эл аралык оюндарына Кыргызстандан 100дөн ашуун спортчу спорттун 14 түрү боюнча катышат. Бул тууралуу Маданият, маалымат, спорт жана жаштар иши министрлиги билдирди.
© Фото / пресс-служба МКИСиМП КР
Эскерте кетсек, оюндар кечээ башталып, аны Россия лидери Владимир Путин ачкан.
Министрлик спорттук иш-чарага Кыргызстан ушу-саньда, ушу-таолу, самбо, каратэ-до, жеңил атлетика, сууда сүзүү, шахмат, байдарка жана каноэ менен сүзүү, бокс, көркөм гимнастика, күрөш, бел боо күрөшү, дзюдо, теннис боюнча катышарын белгиледи.
БРИКС-2024 оюндарында Кыргызстанды кошкондо 93 өлкөнүн өкүлдөрү катышып, мелдеш 12-24-июнь аралыгында өтмөкчү. Ага жалпы жонунан 5000ге жакын адам катышары күтүлүүдө. Алар спорттун 27 түрү боюнча медалдын 387 комплекти үчүн ат салышат.