БИШКЕК, 12-июн. — Sputnik. Кытай менен Россиянын соода-экономикалык байланыштарына үчүнчү өлкөлөрдүн бут тосуп, кедергисин тийгизишинин кереги жок. Бул туурасында Кытай ТИМинин өкүлү Линь Цзяндын айтканын РИА Новости билдирди.
"Кытай бир тараптуу мыйзамсыз санкцияларды эч качан көңүлгө албайт, Пекин менен Москванын кадимки нуктагы соода-экономикалык мамилеси бузулбашы керек же ага үчүнчү, башка бир тараптардын кийлигишпеши шарт", — деген Линь брифингде.
Ал Пекин кытайлык компаниялардын мыйзамдуу укуктары менен кызыкчылыктарын коргогон чараларды кабыл аларын айтты. Өткөн аптанын соңунда Reuters агенттиги G7 мамлекеттери санкциядан кыйгап өтүп, Россияга жардам берип жаткан кытайлык чакан банктарга "катуу эскертүү" бериши мүмкүндүгүн билдирген эле.
ЖМКлардын жазганына таянсак, Италияда 13-15-июнда өтө турган "Чоң жетиликтин" саммитинде мамлекеттердин башчылары "Россия менен Кытайдын соода байланышынан келип жаткан кооптуулукту" талкуулашмакчы. Алдын ала берилген маалыматтарда кытай банктары боюнча расмий билдирүүлөр болот.
АКШ жана G7 мамлекеттери, кыязы, саммит учурунда санкция киргизүү чечимин кабыл алышпайт. Ал эми жогорудай айтылып жаткан "эскертүүнүн" эпкини Кытайдын ири кредиттик уюмдарына тийбейт. Ак үйдүн өкүлүнүн айтымында, Вашингтон жана анын өнөктөштөрү "Россия Батыштын санкцияларынан кыйгап өтпөшү үчүн" банктар менен финансы уюмдарына карата чектелген экинчи чараларды кабыл алууга даяр.
РФ ТИМ өкүлү Мария Захарова Вашингтондун Пекин менен соода алакаларына тоскоолдук кылуучу пландарын Москва суверендүү өлкөлөрдүн иштерине кийлигишүү катары карай тургандыгын айтты. Ал санкциялык коркутуп-үркүтүүлөр РФтин Кытай менен өз ара кызматташуусунан баш тарттыра албастыгын кошумчалаган.
РФ лидери Владимир Путиндин Кытайга жасаган мамлекеттик сапарында тараптар соода алакаларын өстүрүп жана анын түзүмүн жакшыртуу боюнча сүйлөшкөн. Жылдык деңгээлден алып караганда, январь–апрель айларында аталган жаатта көлөм жети пайызга өскөн.