БИШКЕК, 12-июн. — Sputnik. Баткенде эки жашар кыз эс-учу жоголгончо сабалганына шектелип анын өгөй атасы кармалды. Бул тууралуу Баткен ОИИБдин маалымат кызматы билдирди.
Маалыматка ылайык, наристе ооруканага 7-июнь күнү түшкөн. Саламаттык сактоо министрлиги учурда кыз жасалма дем алдыруу аппаратына туташтырылып, комада жатканын маалымдады.
"Мээнин жабык жаракаты, мээнин чайкалышы деген диагноз коюлду. Абалы өтө оор деп бааланууда", — деп билдирди ведомство.
Милиция кылмышка шектүү деп наристенин 40 жаштагы өгөй атасын кармады. Ал Бужум айлынын тургуну экени, убактылуу кармоочу жайга киргизилгени айтылды.