БИШКЕК, 10-июн. — Sputnik. Россия Армениянын Украинадагы элчиси Владимир Карапетяндын Буча шаарына барганына байланыштуу нааразылык нотасын жөнөттү. Бул тууралуу Россия ТИМинин расмий өкүлү Мария Захарова өзүнүн Telegram каналына жазды.
Анын айтымында, Москва муну "достукка туура келбеген кадам" деп эсептейт.
"Биз Еревандын Нор-Норк административдик округунун башчысы Тигран Тер-Маргарян менен Армениянын дипломатиялык миссиясы Владимир Карапетяндын Бучага барышын расмий Еревандын достукка туура келбеген кадамы катары баалайбыз", — деп жазды Захарова.
Украинанын Куралдуу күчтөрүнө жардам берилип, ал жерде Россияга каршы айтылган билдирүүлөргө байланыштуу Армениянын ТИМине нааразылык нотасы жөнөтүлгөн.
"Биз батышчыл "Республика" партиясынын төрагасы Арам Саркисяндын өнөктөшү Тигран Тер-Маргарян сыяктуу ишмерден башка деле нерсе күткөн эмеспиз. Армян бийлиги муну менен тилектеш болуп жатканы өкүнүчтүү", — деп айтылат билдирүүдө.
Өткөн жумада Ереван делегациясы — Армениянын Киевдеги элчиси жана Ереван райондорунун биринин башчысы Украинанын Буча шаарына барган. Делегация мүчөлөрү "Россия агрессиясына" каршы турууда Армения Украина менен тилектеш экенин билдирген.