БИШКЕК, 10-июн. — Sputnik. Санкт-Петербургда өткөн эл аралык экономикалык форумга 139 өлкө жана аймактан 21,8 миң киши катышты. Батыш өлкөлөрүнүн басымына карабай, ПЭЭФке рекорддук санда келишти.
Алардын арасында жогорку кызматтагы чет элдик жетекчилер, министрлер, эл аралык уюмдардын, бирикмелердин, чет жактагы аймактар менен шаарлардын башчылары, бизнестин өкүлдөрү болду.
Делегациянын саны боюнча Кытай (192 киши), Бириккен Араб Эмирлиги (105), Зимбабве (86), Казакстан (84), Индия (80) жана Оман (75) алдыга чыкты.
ПЭЭФтин быйылкы конокторунун ичинен Оман султандыгына конок өлкө макамы ыйгарылды. Атаган мамлекет форумга келечекте өнөр жай, энергетика, туризм, илим жана технологиялар, логистика жана азык-түлүк коопсуздугу тармактарындагы мамлекеттер аралык кызматташтык боюнча биргелешкен долбоорлорду ишке ашыруунун мүмкүнчүлүктөрүн караштыруу максатында катышты. Омандык бизнесмендер, дипломаттар, аткаминерлер "россиялык ишкерлер менен кызматташып, өздөрүнүн өлкөсүндө арбын туристтерди көрүү" боюнча изги тилектери бар экенин айтышты.
Форумдун аянтчасында тармактык жана тематикалык иштиктүү программанын алкагында 380ден ашуун иш-чара өттү. Миңден ашык киши сессиянын спикери, модератору, эксперти катары чыгып, сүйлөдү.
Иш-чараларда технологиялык суверенитет процесстери, санариптик трансформация, туризмди өнүктүрүү, технологиялар, эл аралык финансылык операциялардын көз карандысыз системасын куруу, келечектүү транспорт коридорлору жана башка бир топ маселелер талкууланды.
Форумдун программасында эл аралык кызматташуу маанилүү орунду ээледи. ПЭЭФтин аятнчасында россия-африкалык "Суу алтындан да кымбат" деп аталган конференция, сессия ЕАЭС – АСЕАН сессиясы, Кыргызстан, Азербайжан, Бразилия, Венесуэла, Индия, Казакстан, Кытай, Оман, Түштүк Африка Республикасы, Африка, Латын Америка өлкөлөрүнүн өкүлдөрү менен бизнес-диалог болду.
Негизги көңүл биримдиктин курамын кеңейтүү планы менен кошо БРИКС өлкөлөрү менен соода-экономикалык кызматташуудагы жаңы мүмкүнчүлүктөргө бурулду. Айрым талкуулар ШКУнун алкагында ишкердик өнөктөштүктү өнүктүрүүнүн келечегине, анын ичинде транспорт, энергетика жана жашыл экономика жаатындагы жүрдү.
Форумдун негизги жана маанилүү бөлүгү Россия лидери Владимир Путин, Боливия башчысы Луис Альберто Арсе Катакора жана Зимбабве президенти Эммерсон Дамбудзо Мнангагва катышып, сүйлөгөн сессия болду. Путин өкмөт тарабынан активдүү колдоого алынуучу түзүмдүк өзгөрүүлөрдү белгилеп, Россия экономикасынын жетишкендиктерине, аны менен катар эле өлкөдөгү жана дүйнөдөгү көйгөйлөргө токтолду. Ошондой эле БРИКС алкагында кызматташтык темаларын камтып, кеңири геосаясий маселелер боюнча ой-пикирин билдирди.
Форумдун жыйынтыгы боюнча (суммасы коммерциялык сыр катары калып, ачыкталбагандыгын келишимдерди эсепке албаганда) баш-аягы 6,492 трлн. рубль же болжол менен 73 миллиард доллар болгон 1073 келишимге кол коюлду. Эң көп макулдашуулар региондордун социалдык-экономикалык өнүгүүсү (251), өнөр жай жана курулуш (241), ошондой эле жогорку технологиялар жана телекоммуникация (106) тармагына туура келди.
ПЭЭФти уюштурган Росконгресс фондунан россиялык жана чет элдик ЖМКлардын кызыгуусу адаттан тышкары, өзгөчө болгонун белгилешти. Форумду 34 өлкөдөн 4,2 миң журналист чагылдырганын айтышты.