"Былтыр жайында мамлекеттик тил боюнча Конституциялык мыйзам кабыл алынган. Ал күчүнө кирген соң жарым жыл аралыгында андан макамы боюнча төмөн турган мыйзамдар дал келтирилиши шарт. Андыктан биз азыр 16 мыйзамга толуктоо, өзгөртүүлөрдү киргизүү үчүн мыйзам долбоорун жазып чыктык. Анткени мамлекеттик тилдин орду, макамы кээ бир мыйзамдарда такыр эле көрсөтүлбөй калса, айрымдары жаңы кирди. Мисалы, жарнамалар боюнча азыр колдонулуп жаткан мыйзамда уят сөздөр жазылса жеке жактар 1000, юридикалык жактар 5000 сом айып пулга жыгылат деп гана көрсөтүлгөн. Мындан башка учурларда тилдин нормалары сакталбаган же бузулган башка учурларга эч кандай чаралар каралган эмес. Биз эми жаңы сунуштап жаткан мыйзам долбоорунда мамлекеттик тилдин Конституциялык мыйзамда көрсөтүлгөн эрежелерин бузган учурда чара көрүүнү сунуштап жатабыз. Айта кетүүчү жагдай, бизде расмий тил боюнча да мыйзам бар. Эгер анын нормалары бузулса, андай учурда да тиешелүү чаралар көрүлүшү шарт", — деди Мураталиев.