Башкы прокурор Максат Асаналиевдин биринчи орун басары жана орун басары дайындалды. Бул тууралуу президенттин маалымат кызматы кабарлады. Садыр Жапаров кол койгон буйрукка ылайык, Улукбек Султанов башкы прокурордун биринчи орун басары кызматынан бошотулуп, ордуна Баймурза Маатов дайындалды. Маатов 2022-жылы марттан тарта Балыкчынын прокурору болгону, ага чейин Баткен облусунун, Кызыл-Кыя шаарынын прокурору болуп иштегени, Ош облусунун прокуратурасынын начальниги катары эмгектенгени маалым болду. Ал эми Малик Бектурганов башкы прокурордун орун басары болуп келди. Ал 2022-жылы майда ротация менен Ош шаарына прокурор болуп барган. Ушул жумада башкы прокурор болуп Курманкул Зулушевдин ордуна Максат Асаналиев дайындалган.
Ысык-Көлдө жол жээгине туристтерди тейлей турчу борборлор салынып жатканын Транспорт жана коммуникациялар министрлигинен кабарлашты.Билдирмеге караганда, мындай объектилерден бешөө салынып жатат. Министрдин орун басары Ырысбек Барпиев Түп менен Балыкчыдагы борборлордун курулуш иштери менен таанышып, мындай жайлардын салынышы Ысык-Көлдөгү инфраструктураны жакшыртып, Кыргызстанга келген коноктор үчүн ыңгайлуу шарттарды түзүүгө мүмкүндүк берерин белгилеген. Жергиликтүү жана чет элдик туристтер үчүн мындай борборлор бардык керектүү кызматтарды камтый турганы айтылды. "Долбоор Дүйнөлүк банк тарабынан каржыланууда. Курулуш иштери аяктагандан кийин бул борборлор Экономика жана коммерция министрлигинин алдындагы Туризм департаментинин балансына өткөрүлүп берилет", — деп жазылат кабарда.
14-июндан тарта жүргүнчүлөрдү ташыган поезд Бишкек — Балыкчы — Бишкек каттамы ишке кирет. Бул тууралуу "Кыргыз темир жолу" ишканасы кабарлады. Билдирмеге караганда, поезд 14-июндан 14-июлга чейин жума, ишемби, жекшемби күндөрү каттайт. 15-июлдан тарта августтун аягына чейин күн сайын жүрмөкчү. "Поезд Бишкек-2 бекетинен саат 07:40та чыгып, Балыкчыга саат 11:46да жетип калат. Балыкчыдан кайра саат 18:12де чыгып, Бишкекке 22:18де келет. Поезддин ичинде кондиционер, жумшак отургучтар, дивандар жана буфет бар", — деп жазылат кабарда.
Токтогул Сатылганов атындагы Кыргыз улуттук филармониясында Россия күндөрүнө карата майрамдык концерт өтөт. Бул тууралуу Россиянын Бишкектеги илим жана маданият борборунан билдиришти. Маалыматка ылайык, концерт 12-июнда саат 18:30да башталат. Аны Россия Федерациясынын Кыргызстандагы элчилиги, карачайлардын "Ата Журт" эл аралык ассоциациясы уюштурууда. Маданий иш-чарага КРдин эмгек сиңирген артисттери Каныкей Раймалиева, Жылдыз Осмоналиева, Игорь Воронцов, аткаруучулар Бек Исраилов, Бегимай Турусбекова, эл аралык сынактардын лауреаттары Миран Жанарбаев, Сафина Самиева, Анастасия Гриб, Элгиз Бейшенбаев, Урмат Сатыбалдиев, Эмир Абыкеев жана бир катар ансамблдер, бий топтору катышат.
Россияда мобилизация жүргүзүүгө эч кандай муктаждык жок. Бул тууралуу Россия президенти Владимир Путин XXVII Петербург эл аралык экономикалык форумунун пленардык жыйынында билди