Жаңы паспорттор "Учкун" ААК басмаканасынан чыгарылууда. Анда мурдагысынан айырмаланып коргоо элементтери күчөтүлдү. Жалпы жарандык паспортко 30, ID-картага 20 коргоо элементи коюлган. Бул тууралуу Кубанычбек Садамбеков Sputnik Кыргызстан радиосунун эфиринде маек куруп жатып билдирди.
Анын айтымында, жакшыртылган коргоо элементтери мурдагыдай жасалма паспортторду даярдоодон сактайт.
"Бул жылдын 31-майынан тарта жаңы үлгүдөгү жалпы жарандык жана ID-паспортторду бере баштадык. Алар Кыргызстандын өзүнөн чыгып жатат. “Учкун” басмаканасына атайын сапаттуу, эл аралык деңгээлдеги жабдуулар алып келинди. Жаңы үлгүдөгү паспорттор коргоо элементтери көбөйгөнү менен айырмаланат. ID-паспорттун ичине электрондук чип орнотулган. Жалпы жарандык паспортто да чип бар, ал анын сыртында бекитилген. Алар көзгө көрүнбөйт жана эл аралык стандарттардын талаптарына жооп берет", — деди Садамбеков.
Мындан тышкары, паспорттордун баасы коңшу өлкөлөргө салыштырмалуу арзан экенин кошумчалады.