БИШКЕК, 6-июн. — Sputnik. Россия ТИМинин расмий өкүлү Мария Захарова Франциянын тышкы саясат боюнча ведомствосунун Парижде россиялык дипломаттарга "санкция киргизүү" боюнча опузалоосуна комментарий берип жатып, жооп кайтарган чаралар болорун айтты. Бул туурасында РИА Новости жазды.
Франция ТИМи буга чейин Россиянын Париждеги дипломатиялык өкүлчүлүгүнүн Украинага француз инструкторлорунун жөнөтүлүшүнө жасаган комментарийлери көз жаздымда калбастыгын айтып, эскерткен.
"Мен анда Г вариантын кошумчалайын: биздин дипломаттарга тийишкендер жообун алат", — деген Захарова.
Ал опузалоолор Франциядагы элчиликтин маалымат катчысы ТИМ башчысы Сергей Лавровдун эгерде Украинага сапар ала турган болсо француз инструкторлору россиялык куралдуу күчтөрдүн мыйзамдуу бутасына айланарын айтканына жасаган комментарийинен улам башталганын белгиледи. Элчиликтин өкүлү, өзгөчө, украин согушкерлерин орус жоокерлерин бутага таамай алууну үйрөтүп жаткан инструкторлор "согушта согуштагыдай" мыйзамдуу бута болуп калышарын айткан.
Батышта соңку учурларда алардын Украинадагы согушка түз кийлигишүүсү кызуу талкууланууда. Макрон буга чейин эгерде РФ фронттун чектерин жарып өтсө жана Украина суранса Киевге аскерлерди жөнөтүү мүмкүнчүлүгүн четке какпай турганын билдирген. Анын айтымында, көп өлкөлөр Франциянын мындай кадамына кошулган. Анткен менен май айынын башында анын сөзүн НАТОнун башкы катчысы Йенс Столтенберг четке каккан. Альянстын Украинага аскер жөнөтүүгө ниети жок, Киев да муну суранган эмес деген. Corriere della Sera басылмасы НАТО июлдагы саммитинде Украинадагы согушка тикелей кийлигишүүдөн баш тартуу жазылган декларацияны бекитиши мүмкүн. Ал документтин долбоорундагы маанилүү фраза — "башка жерлерди аскерлердин буту баспашы керек".
Батыштагы саясатчылардын Россия боюнча согуштук билдирүүлөрүнөн улам президент Владимир Путиндин тапшырмасы менен Түштүк аскер округунда ракеталар пайдаланылган машыгуулар башталды. Анда стратегиялык эмес өзөктүк куралдарды колдонууга жатыгып жатышат.