БИШКЕК, 5-июн. — Sputnik. Кыргыз футбол союзунун төрагасы Камчыбек Ташиев улуттук курама команданын оюнчулары менен жолукту. Бул тууралуу Футбол союзунан кабарлашты.
Билдирмеге караганда, Ташиев футболчуларга дүйнө чемпионатынын кийинки раундуна өтүүнү каалаган.
"Эртең баарыбызды абдан маанилүү оюн күтүп жатат. Сиздердин оюнуңуздар футбол сүйүүчүлөрүнө өлкөдөгү футболдун жаркын келечеги бар деген үмүттү берет. Азыр бардык өлкөнүн сиздерге көз салып турган кези. Андыктан эртеңки оюнда жеңишке жетип, Азия кубогунун жолдомосуна ээ болуп, дүйнө чемпионатынын кийинки раундуна өтөбүз деп үмүттөнөм", — деген союз төрагасы.
Белгилей кетсек, эртең Дөлөн Өмүрзаков атындагы стадиондо Кыргызстандын курамасы Малайзия менен беттешет. Бүгүн стадиондо расмий машыгуусу болгон.