Социалдык кызматкерлер психология, социология жаатында ар тараптуу болуп иштеп жатканы менен кадр жетишпестиги байкалууда. Бул тууралуу Алия Чокоева Sputnik Кыргызстан радиосуна маек куруп жатып билдирди.
Андан сырткары, майыптыгы бар балдардын ата-энелеринин өздөрү да жардамга муктаж учурлар кездешкендиктен бул жаатта окутуулар уюштурулуп келерин айтты.
"Жер-жерлерде аутизм, Даун синдрому бар, ДЦП менен жабыркаган балдарды коомго аралаштырууга аракет жасап жатабыз. Бул иш-чарага мамлекеттен миллиондогон акча бөлүнөт. Өлкөнүн ар бир районунда жогорудагы категорияга кирген балдарды реабилитациялоодо, кызмат көрсөтүүдө өкмөттүк эмес уюмдар менен чогуу иштешебиз. Кызматташуу үчүн конкурска катышкан уюмдар алгач көрсөтө турган кызматын сунуштап, айтып беришет. Бул жаатта министрлик бир канча иштерди жасоодо. Баш калаада балдарды акысыз карап, кызмат көрсөткөн "Келечек" реабилитациялык борбору оңдолду. Жазылуу үчүн ата-энелер борборго арыз менен кайрылышы зарыл. Дагы бир маселе, көп учурда баласы оорукчан же майыптык менен төрөлүп калган ата-энелер коомчулукка алып чыгуудан тартынат. Ата-энелердин өзүнө да жардам керек учурлар болот. Андыктан аларга да баласына кам көрүү боюнча окутуулар уюштурулуп келет", – деди Чокоева.
Ал мүмкүнчүлүгү чектелген балдардын ата-энеси бул жаатта билим алыш үчүн социалдык бөлүмдөргө кайрылышы керектигин кошумчалады.