БИШКЕК, 4-июн. — Sputnik. ЖККУ Ереван уюм менен болгон мамилесинин келечегин жолго коет деп үмүттөнөт. Бул тууралуу ЖККУнун Башкы катчысы Имангали Тасмагамбетов ЖККУ Парламенттик ассамблеясынын (ПА) Кеңешинин жыйынында билдиргенин Sputnik Армения жазды.
"Биз республиканын саясий жетекчилиги ЖККУ менен мамилесинин келечегин тактайт деп ишенебиз. Бул биздин ассоциациянын бардык катышуучуларына, биринчи кезекте келечектеги биргелешкен иш-чараларды толук пландоо үчүн пайдалуу болмок", — деди ал.
Башкы катчы белгилегендей, өткөн жылы Армениядан келген кесиптештер уюмдун иш-чараларына катышуусун кыйла кыскарткан, ошентсе да кызматташуунун негизги механизмдери иштеп жатат.
"Армения уюмдун толук кандуу мүчөсү бойдон калууда. Өлкөнүн алдындагы бардык милдеттенмелер толук сакталат", — деди Тасмагамбетов.
Эске салсак, 2024-жылдын февралында Армениянын премьер-министри Никол Пашинян Ереван ЖККУга катышуусун тоңдурганын билдирген. Ал март айында эгер уюм Ереван өлкөнүн суверендүү аймагы боюнча койгон суроолоруна жооп бербесе, Армения ЖККУдан чыга турганын жарыялаган. Андан мурда армян тарап ЖККУнун иш-чараларына катышууну токтоткон.
Кийинчерээк Армениянын Тышкы иштер министрлигинин маалымат кызматы республика "ЖККУнун 2024-жылга бюджети жөнүндө" чечимге кошулуудан жана уюмдун бул чечимде каралган ишмердүүлүгүн каржылоого катышуудан баш тарта турганын билдирди.