2024-жылдын 30-майынан 2-июнуна чейин Бишкек шаарында “Орто кылымдардагы Евразиядагы саясий, социалдык-экономикалык жана этномаданий процесстер” II Эл аралык илимий конференциясы болуп өттү. Конференция Ж.Баласагындын “Кутадгу билиг” поэмасынын 955 жылдыгына арналган. Аталган иш-чарага 100дөн ашуун илимпоздор катышты.Биринчи конференция 2023-жылы июнь айында КУУнун базасында өтүп, ага Россия, Кыргызстан, Өзбекстан, Казакстан жана Азербайжандан 80ден ашык окумуштуулар катышкан. Конференция илимий жана эксперттик коомчулук тарабынан жогору бааланып, аны жыл сайын өткөрүлүүчү иш-чара кылуу чечими кабыл алынган эле.Конференциянын максаты - түрк цивилизациясынын калыптанышына жана өнүгүшүнө байланыштуу орто кылымдардагы Евразиянын алкагындагы тарыхый, маданий, тилдик, социалдык-экономикалык, этностор аралык жана башка процесстерге талдоо жүргүзүү. Орто кылымдардагы Евразиянын тарыхы боюнча археологиялык жана жазма булактарды изилдөөгө байланышкан темалар, башкаруунун түрк-моңгол модели жана Москва мамлекетинин мамлекеттик институттарынын өнүгүшүнө түрк-моңгол факторунун таасири, Евразиядагы түрк элдеринин тарыхындагы Улуу Жибек жолу жана башка маселелер каралды.
Иш-чара тууралуу кененирээк Ж. Баласагын атындагы КУУнун чөлкөм таануу жана кыргыз таануу кафедрасынын башчысы, “Кең Алтай” түркология жана алтаистика илимий изилдөө борборунун өкүлчүлүгүнүн директору, тарых илимдеринин доктору, профессор Жамыйкат Өмүрова жана Б. Турусбеков атындагы Кыргыз мамлекеттик дене тарбия жана спорт академиясынын социалдык, гуманитардык илимдер кафедрасынын башчысы, тарых илимдеринни кандидаты, доцент, “Кең Алтай” долбоорунун мүчөсү Замира Садырова “Күн башат” уктуруусунун алкагында айтып беришти.