БИШКЕК, 3-июн. — Sputnik. Новосибирск шаарына 1-июндан 3-июнга чейин Чыңгыз Айтматов атындагы Орус драма театры гастролдоп барды. Бул тууралуу ТИМден билдиришти.
Маалыматка ылайык, программа Чыңгыз Айтматовдун "Деңиз бойлой жорткон Ала-Дөбөт" чыгармасынын негизинде коюлган мифологиялык поэма менен башталган. Ал эми 2-3-июнда Александр Пушкиндин "Пиковая дама" повести боюнча фарс жана Владимир Гуркиндин "Любовь и голуби" лирикалык комедиясы коюлган.
Белгиленгендей, 2025-жылдын сентябрында Новосибирск мамлекеттик академиялык "Красный факел" театры Кыргызстандын борборуна келет.
Аталган иш-чарага Новосибирск облусунун губернатору Андрей Травников, Новосибирск облусунун маданият министри Юлия Шуклина, чет мамлекеттердин дипломатиялык корпусунун өкүлдөрү жана кыргыз диаспораларынын жетекчилери катышканы кошумчаланды.