БИШКЕК, 2-июн. — Sputnik. АКШнын Владимир Зеленскийдин режимин сактап калуу максатындагы Россияга каршы согушу акылсыздык болгон. Бул туурасында АКШнын президенттигине талапкер Роберт Кеннеди (кичүүсү) X социалдык тармагында айтканын РИА Новости жазды.
"Пентагондун иликтөөлөрүндө Россия менен өзөктүк согуш оту жанса биринчи мүнөттө эле 90 миллион америкалык набыт болот жана кийинки алты айда дагы 90 миллион эл көз жумат. Кыязы, бул азайтылып айтылган сандар", — деп белгилеген ал.
Саясатчынын пикиринде, украиналык армиянын Россиянын аймактарындагы объектилерди аткылоосуна уруксат берүү жана Киев режими "сактайбыз" деп Москва, Пекин, Түндүк Корея менен болгон мамилелерди ырбатып алуу жогорудагыдай көрүнүшкө алып келет.
Жума күнү АКШнын Мамлекеттик департаментине таянып, РИА Новости АКШнын президенти Жозеф Байден Харьковдун кооптуулугуна коркунуч жараткан Россиянын аймактарындагы буталарды америкалык курал менен контрбатареялык күрөш жүргүзүү үчүн аткылоого Украинага уруксат бергенин кабарлаган. Бирок ыкчам-тактикалык ATACMS ракеталарын жана алыска атылуучу башка каражаттарга салынган тыюу күчүндө калтырган.
РФ президенти Владимир Путин НАТОнун мамлекеттери Россиянын түпкүрүндөгү "мыйзамдуу буталарын" АКШнын Украина армиясына берген куралдарын колдонуп аткылоо боюнча Киевдин планына уруксат берип жатканда "ким менен ойноп жатканын" эсине алышы керектигин эскерткен.